Sunday Early Curfew sa Guadalupe padayunon

CEBU, Philippines — Bisag ubos na karon sa general community quarantine (GCQ) ang Siyudad sa Sugbo gipadayon gihapon sa Brgy. Guadalupe ang ilang “Sunday Early Curfew” human nila nakita nga epektibo kining nakakontrol sa pagsaka sa mga kaso sa Covid-19 diha sa ilang barangay.

Nagsugod ang maong kamandoan sa miaging buwan panahon sa modified enhanced community quarantine (MECQ) ang tibuok siyudad kun diin sab ang Guadalupe nalakip sa dunay labing daghang kaso dinhi sa siyudad.

Suma pa ni Kapitan Michael Gacasan gituyo nila kini isip usa sa pamaagi alang sa pagkontrolar sa movement sa mga tawo sa ilang dapit.

Magsugod sa alas 4 sa hapon ang curfew matag adlaw nga Domingo, ang mga establisamentong sama sa mga botika ug kadtong essential establishments lamang maoy gitugotang magpabiling abli.

Wala pa’y tataw nga petsa kun hangtud kanus-a kutob ang pagpadayon sa maong lagda.

Gihingusgan usab sa maong barangay ang pagdili sa pag-inom og ilimnong makahubog sa pampublikong lugar. Makasulod ra ang mga pampublikong sakyanan aron dunay kasakyan ang mga APOR.— IBM (BANATNEWS)