Lambda variant nia na sa Pilipinas

CEBU, Philippines — Gipahibalo sa Department of Health nga nakasulod na dinhi sa nasud ang Lambda variant sa Covid-19 samtang 182 sab ka Delta variants ang ilang natala kahapong adlawa.

Sumala pa sa DOH sa report sa Philstar.com, usa ka 35- anyos nga babaye ang napositibo sa Lambda variant  nga gikonsiderar sa World Health Organization nga “variant of interest.”

Kini unang na-detect didto sa nasud sa Peru. Gisusi pa kung diin nakuha sa maong babaye ang maong sakit ug kun ang babaye gikan ba sa abroad.

“The case was asymptomatic and tagged as recovered after undergoing the 10-day isolation period,”  matud pa sa DOH.

Gihimo dayon ang back tracing ug lawom nga imbestigasyon kabahin niini. Ang Lambda gitawag sab nga C.37 ug giisip sa WHO nga variant of interest niadtong Hunyo 14.

Padayon pa ang pagtuong gihimo bahin sa maong variant kun unsay kalainan niini sa uban pang variants sa Covid-19 o SARS-CoV-2.

Ang Lambda variant giingong lahi og kinaiya sa Delta ug sa orihinal nga variant gikan sa Wuhan, China. Sumala pa sa report sa Reuters, dunay pagtuon sa Japan nga nag-ingong dili mosalir ang Covid-19 vaccine batok niini.

Duna sab kini tulo ka mutations sa protina nga gitawag og RSYLTPGD246-253N, 260 L452Q and F490S, nga maoy nakaingon nga dili kini madutlan sa bakuna.

Dugang mutations niini nga T76I ug L452Q maoy nagpahimo sa Lambda nga “highly infectious” mao nga sa gipublikar nga report diha sa bioRxiv, ang mga researchers mipasidaan nga basin magkumpiyansa ang mga tawo sa Lambda variant kay gikonsiderar lang sa WHO nga “Variant of Interest” imbes nga “Variant of Concern.”

Delta variant

Sa laing bahin, 112 sa 182 ka dugang Delta variant infections nangatakdan dinhi lang sa nasud samtang  36 nila sab mga gikan sa abroad, 34 sab ang padayon pang gi-verify.

Ang 78 niini gikan sa Luzon, samtang upat dinhi sa Central Visayas, Davao Region, Western Visayas, Northern Mindanao, Cordillera Administrative Region, ug Bangsamoro Autonomous Region in Muslim Mindnao.

Hinuon usa nalang sa 182 ka Delta infections ang pabiling aktibo ang kadaghanan nangaayo na apan upat ang namatay ug dunay usa nga padayon pang giberipika.

Ang Pilipinas duna nay 807 nga kinatibuk-ang kaso sa Delta variant. Samtang duna say 41 ka dugang kaso sa Alpha variant nga unang na-detect didto sa nasud sa United Kingdom, 66  sab nga Beta variant nga una sab na-detect didto sa South Africa, ang 40 mao ang gitawag nga P.3, variant nga gitangtang na sa listahan sa variants of interest apan padayong gipanid-an.

Kun itandi sa orihinal nga Covid-19 variant gikan sa Wuhan, ang mga pasyenteng nataptan og Delta variant mas daghan og nakitang virus sa tutunlan ug ilong niini.

Nakita kini pareho sa mga wala magpabakuna ug sa kompleto na sa bakuna. Apan mas kuyaw kini para niadtong wala mabakunahi.

Tungod niini, dunay mga tinguhang kinahanglang bakunahan og booster shot o ikatulong bakuna ang mga tawo aron mas mapalig-on ang anti-bodies batok sa coronavirus. (BANATNEWS)