Santander niapatuman og stay home policy

CEBU, Philippines — Laing lungsod sa habagatang bahin sa lalawigan sa Sugbo ang mopatuman og “restriksyon” sa ilang lungsod sugod karong adlawa tungod sa pagsaka sa mga kaso sa coronavirus sa ilang lungsod.

Si Santander Mayor Marites Buscato niluwat kagahapong adlawa og pito ka adlaw nga “restriction” ug paglimita sa lihok sa mga konstituwente niini isip lakang aron dili na mokatap ang coronavirus disease (covid-19) sa lungsod.

Ang maong kamandoan magsugod Hulyo 26 o karong adlawa hangtod sa Agosto 1, 2021 ubos sa EO No. 070-07-2021.  Estriktong ipatuman ang “stay at home” order sa mga residente gawas kin importante ang tuyo sa gawas.

Mandatory gyud ang pagsul-ob og face mask, face shields sa pampubliko nga lugar ug sa mga government offices.

Walay panagtapok o social gatherings nga itugot sama sa birthday, kasal lakip na ang mga sports activities.

Suspendido sab una ang kalihokan sa simbahan apil na ang misa. Sarado ang mga videoke, internet cafes ug fitness gymnasium.  Suspendido usab ang Philippine National ID System registration.

Ang curfew magsugod alas-9 sa gabii hangtod alas- 5 sa buntag pagkaugma.

Ang mga bata o minorde edad gikan 15 anyos paubos dili tugtan makagawas sa mga pampublikomg lugar gawas kun adunay medical emergency.

Bawal sab modawat og mga bisita. Bawal ang picnics ug ang pangaon o paginom- inom sa baybayon sa lungsod.

Ang mga tourism establishments sama sa resorts, inns o homestay nga adunay business permit certificate of compliance tugotan nga makapadayon pag operate apan kinahanglan abisohan ang mga bisita nga dili moadto sa beach aron mangaon o maginom o langoy2 aron way magtapok.

Ang mga restaurants ug kan-anan tugotan usab nga maka operate apan bawal ang dine-in o “take out only”lang amg ipatuman.

Una nang nipatuman og lockdown ang lungsod sa Samboan gumikan sa pagsaka sa mga kaso sa Covid-19 sa ilang lungsod.

Samtang sa pikas nga bahin gibutyag usab ni bokal Christopher “Dong” Baricuatro sa 7th district nga siya nagpositibo sa Covid-19.

Sa iyang facebook page, ang bokal nagkanayon nga niadtong Hulyo 19, 2021 nagsugod siya nakasinati og ubo ug nawala ang panimhot ug panlasa hinungdan nga nag self-quarantine dayon  siya.

Si Baricuatro nagkanayon nga fully vaccinated na hinoon siya batok sa Covid-19 gamit ang Sinovac ug mild ra ang sintomas nga iyang nasinati.

Ang iyang pamilya nag quarantine na usab sumala sa bokal. —IBM (BANATNEWS)