Mandaue nangandam sa laing pagsaka sa kaso sa COVID-19

CEBU, Philippines — Higpit karon nga gipangandaman sa kagamhanan sa Dakbayan sa Mandaue ang posibleng laing pagsaka sa kaso sa COVID-19.

Matud ni Atty. Jamaal James Calipayan, city administrator nga kasamtangang nagpadayon og saka ang kaso sa COVID- 19.

Sa maong sitwasyon ang siyudad nangita og dugang isolation centers ug mga contact tracer.

Lakip karon sa ilang gikonsiderar ang dormitories, pension houses ug English School nga himuong isolation center.

Sa kasamtangan ang kagamhanan sa Dakbayan sa  Mandaue nagbaton lang kini og duha ka isolation facilities gilangkuban sa karaang North Bus Terminal sa Barangay Subangdaku ug Norkis Park sa Barangay Looc ug ang maong mga pasilidad makaakumodar lang kini og tag 100 ka tawo.

Sa laing bahin, base sa datos sa Department of Health-7 ang Dakbayan sa Sugbo nakatala kini og 181 nga bag-ong kaso sa COVID-19.

Ang siyudad aduna na kini 27,602 total cases diin sa maong gidaghanon 1,581 niini ang active cases.

Ang siyudad nakatala kini og 81 ka dugang recoveries ug niabot na ngadto sa 25,129 ang kinatibuk-ang recoveries ug 892 ang nangamatay.

Samtang ang Mandaue City adunay 7,456 total cases lakip niini ang 43 ka bag-ong kaso ug 489 ang active cases sa siyudad, 6,730 ang recoveries lakip niini ang 12 nga nadugang ug 237 ang nangamatay lakip niini ang usa nga nadugang.

Ang Lapu-Lapu City adunay 7,624 total cases lakip niini ang 46 nga nadugang, 619 ang active cases, 6,828 ang recoveries lakip niini ang 33 nga nadugang ug 177 ang nangamatay lakip ang usa nga nadugang.

Base usab sa datos sa DOH-7, ang Central Visayas adunay 80,547 total cases sa; 8,964 ang active cases; 69,240 ang recoveries ug 2,343 ang nangamatay.

Sa laing bahin usab, Si Police Lieutenant Colonel Wilbert Parilla, deputy city director for operations sa Cebu City Police Office nagkanayon nga ang extraction team sa COVID-19 sa Dakbayan sa Sugbo paspas kaayo sa ilang mga trabaho sa pagkuha sa mga positive aron dalhon diha sa mga isolation center.

Dugang ni Parilla nga human makuha sa extraction team ang mga nag-positive aduna usab dayon nagbantay sa mga close contact nga gipang-isolate. —Decemay P. Padilla, Rowena D. Capistrano/BDB (BANATNEWS)