Mamaligyaay og karne ipahiluna sa Unit 1 Carbon Market
CEBU, Philippines — Hingusgan sa Cebu City Market Operations Division (MOD) ang “proper zoning” alang sa mga mamaligya og karne ug dili kini basta-basta makapamaligya bisan asa nga dapit sa Carbon Market.
Suma pa sa hepe sa MOD nga si Irvin Caballes nga ang tanang namaligya og karne adto ra gyud mopuwesto sa Unit 1 aron maklaro ang pagmonitor ilabi na sa saktong pagplastar niini.
“Katung namaligya nga naa ra sa kilid-kilid, ato na sila nga giwarningan nga mohunong na. Ato hinuon sila gihatagan og higayon nga makakuha og mga permit o certificate aron makapamaligya sila og karne, pero adto na gyud sa saktong lugar, “matud pa ni Cabales.
Sa miaging adlaw , nakigtagbo sa meat ug fish vendors ang MOD kauban ang Department of Veterinary Medicine and Fisheries (DVMF) ug Cebu City Health Department diin gipahinumduman sila sa mga lagda ug regulasyon kabahin sa Hygienic Handling of Newly Slaughter Meat ug sa Chilled, Frozen ug Thawed Meat.
Gihisgotan usab ang kabahin sa pagrehistro ug paglisensya sa mga meat stakeholders.
Suma ni Cabales nga importante kaayo ang saktong pagmintinar ug pagplastar sa mga baligyang karne ug isda aron maseguro nga luwas kini nga kan-on sa mga konsumidor. —MEL (BANATNEWS)
- Latest