Siyudad sa Toledo nanghatag og ayuda sa mga residente
CEBU, Philippines — Nag-apod apod ang Kagamhanan sa Siyudad sa Toledo og pagkaon, tsinelas, bitamina ug tambal ngadto sa ilang mga konstituwente.
Gawas niini, nagpadayon usab ang ilang serbisyong medikal kun diin tipik kini sa nagpadayon nga programa sa siyudad nga “Halad Alagad sa Barangay”.
Sa miaging adlaw, ang Barangay Sagay maoy giduaw ni Mayor Joie Piczon-Perales ug sa tibuok sakop sa konseho alang sa pagpadangat sa mga nag-unang serbisyo.
Lakip usab sa gialagaran sa maong programa mao ang mga mag-uuma.
Tumong ni Mayor Perales nga mahatod diretso sa kabaranggayan ang mga nag-unang programa sa siyudad.
Sa laing bahin, nakadawat usab og suporta ang Toledo City gikan sa Department of Agriculture.
Kini human sila gihatagan og “cultivator” nga mobalor og dili mominus sa P 250, 000.
Nagkanayon si Perales nga dako kaayo og matabang ang maong cultivator ngadto sa mga mag-uuma nga gihulagway usab niya nga dunay dakong bili sa paglambo sa ekonomiya sa Siyudad sa Toledo. MEL (BANATNEWS)
- Latest
