CPPO wala pay witness sa pagpatay sa magtiayong Sanchez
CEBU, Philippines — Nanawagan karon ang kapolisan sa Cebu Police Provincial Office (CPPO) sa mga nakasaksi sa pagpatay sa mag-tiayong Sanchez.
Ang mga biktima napalgan kining patay na diha sa sulod sa ilang sakyanan niadtong Hunyo 19 niining tuiga.
Matud ni Police Colonel Engelbert Soriano, hepe sa CPPO nga bisan pa og aduna na silay resulta sa forensic investigations uban pa sa laing ebidensiya nga nakuha nagkinahanglan gihapon sila og witnesses sa maong krimen.
“We still lack eye witnesses or witnesses na pwedeng pumunta sa amin para tulungan kaming mag-corroborate sa mga ebidensiya na nakalap namin. At rest assured po, kausap din namin ang family, ina-assured namin sila na tuloy-tuloy yung investigation namin sa kaso”, matud ni Soriano.
Gibutyag ni Soriano nga aduna na silay person of interest sa maong krimen apan kinahanglan gihapon kining ilhon sa witness.
Matud usab ni Soriano nga aduna na silay gitan-aw karon nga motibo apan wala una nila kini ibutyag samtang nagpadayon pa ang imbestigasyon.
Nasayran nga ang magtiayong Gavino, 49, usa ka negosyante ug Arlene Sanchez, 47, usa ka magtutudlo sa Tubod Elementary School, mga residente sa Lungsod sa Minglanilla ang napalgang patay na sulod sa usa ka itom nga pickup truck niadtong Hunyo 19, 2021 diha sa Barangay Tananas usa sa mga bukirang barangay sa Lungsod sa San Fernando.
Gikataho nga ang maong magtiayon nawala kini niadtong Miyerkules sa gabii, Hunyo 16, 2021. (BDB) (BANATNEWS)
- Latest