Positivity rate sa Mandaue misaka
CEBU, Philippines — Misaka karon og 6.28 porsiyento ang positivity rate sa mga natakdan og Covid-19 sa Dakbayan sa Mandaue niining unang semana sa bulan sa Hulyo kun itandi sa bulan sa Hunyo 2021.
Si Atty. Lizer Malate, pangulo sa Emergency Operations Center (EOC) sa maong siyudad miingon misaka gyud ang gidaghanon sa mga napositibo sa mga nagpa swab test matag adlaw.
Si Malate miingon nga average sa matag adlaw namatikdan nga adunay 10 porsiyento nga pagsaka kon itandi sa unang 15 ka adlaw sa bulan sa Hunyo 2021.
Si Malate miingon nga base Hulyo 11, 2021 talaan sa COVID -19 bulletin sa Department of Health Central Visayas ang dakbayan nakatala og 340. Hinuon nagtuo si Malate nga di kini angay ikahibulong tungod kay daghan namang patigayon ang giablihan ug gitugtan na ang 5-anyos nga bata pataas sa paggawas sa ilang panimalay. Nunot aning pagsaka sa mga kaso gitinguha sa EOC nga malugwayan ang Executive Order Number 19 ni Mayor Jonas Cortes alang niadtong mga biyahidor gikan sa Bohol, Negros Oriental ug Negros Occidental mga mobisita sa dakbayan kinahanglang mopresentar og negative result sa RT-PCR test nga gikuha sulod sa 72 oras.
Mahimo usab nga ipresentar ang negative result sa Rapid Antigen test nga gikuha sulod sa 48 oras.
Tinguha nilang malikayan ang pagtakod sa virus gikan sa mga biyahidor sa mga molupyo sa dakbayan .— IBM (BANATNEWS)
- Latest