Flight gikan sa Singapore nakatugpa sa MCIA

CEBU, Philippines — Malampusong nakabalik na ang inbound international commercial flights diha sa Mactan Cebu International Airport kagahapon sa hapon human nga nakatugpa ang usa ka abyon gikan sa nasud sa Singapore alas-2 sa hapon nga dunay sakay nga 127 ka pasahero.

Dunay laing flight usab nga gikatakdang moabot alas 10:30 kagabii gikan sab sa nasud sa South Korea nga dunay sakay nga 150 ka pasahero.

Si Atty. Glenn Napuli, officer-in-charge sa Mactan Cebu International Airport miingon nga kadtong mangabot nga mga pasahero mopaubos og orientation ug swab test ayha pa sila palahuson ngadto sa ilang mga hotel aron magpaubos sa kwarantina.

Samtang gipahibalo sab ni Napuli nga duna untay flight gikan sa Doha, Qatar nga gikatakdang moabot sa MCIA alas 4:50 sa hapon ang giingong gikanselar sa wala pa ng pahibalo kagahapon.

Ang tigpamaba sa Department of Health-7 ug  chief pathologist Dr. Mary Jean Loreche miingon nga kadtong mga pasaherong nangabot gikan sa Singapore gipaubos dayon sa swab test subay sa Cebu protocol nga “swab-upon-arrival” policy sa Sugbu. Ang mga nangabot nga mga pasahero gilangkoban og 100 ka OFWs ug 27 ka ROFs.  Sa pikas bahin, ang Integrated Bar of the Philippines-Cebu City chapter mipagawas og resolusyon nga nag-awhag sa Inter-Agency Task Force nga makigalayon sa mga LGUs alang sa way kahasol nga paghatud sa mga serbisyo nini ug pagpatuman sa mga health protocols. “

There is a need to reconcile Executive Order No. 17 Series of 2021 and Provincial Ordinance No. 2021-04 of the Province of Cebu, on one hand, and IATF Resolution Nos. 114 and 116 on the other, in order for them to truly embody the program of “We Heal as One” of the country and help alleviate the plight of Returning Overseas Filipinos (ROF) and Overseas Filipino Workers (OFW) and their families,” tipik sa upat ka pahinang resolusyon sa IBP-Cebu chapter nagkanayon.

Sumala pa sa ilang Resolution Number 5 series of 2021 nakauyon gyud sila nga gikinahanglang duna gyuy konsultasyon sa LGUs kabahin sa mga mugnaon o umolong mga pamaagi aron pagsanta, pagpugong ug pagdumala sa pagkatap sa Covid-19 isip mga ahensiya sa gobiyerno diha sa lokalidad ug maoy nanguna sa pagpabarog sa nasud subay sa gitawag karon nga new normal.

Giawhag sab nila ang IATF ug uban pang mga nasudnong ahensiya sa gobiyerno nga ikonsiderar ang mga kasamtangang balaod, ordinansa ug uban pang kamandoan nga gipatuman sa mga LGUs.— /IBM (BANATNEWS)