Pfizer vaccines sa Cebu City nahurot na
CEBU, Philippines — Gibutyag ni Cebu City Health officer-in-charge Dr. Jeffrey Ibones nga nagamit na ang tanang supply sa Pfizer vaccine nga gitagana alang sa Cebu City.
Irekomendar na usab ni Ibones ngadto kang Bise Mayor Michael Rama nga ipadayon ang paggamit sa University of Cebu (UC) Senior High School Private Campus isip vaccination site .
Ang siyudad gigahinan og 5,800 doses nga Pfizer vaccine sa nasudnong kagamhanan.
Sa laing bahin, gipahibalo ni Konsehal Dave Tumulak kagahapon nga 40,267 na ka tawo sa siyudad ang nabakunahan na sa nagkadaiyang brand. Ang 9,768 niini kay naa na sa ikaduha nga dose.
Ang siyudad duna karoy kinatibuk-ang 24,246 kaso sa COVID-19 sukad sa pagsugod sa pandemiya sa miaging tuig.
Niadtong adlaw nga Huwebes dunay 29 ka bag-ong kaso ug 476 ang active cases base sa datos sa Department of Health Central Visayas.
Samtang nianang adlawa, 12 ka pasyente ang nangaayo na samtang nagpabiling 864 ang mga nakalas.
Sa pikas bahin, 90 ka tawo sab ubos sa A2 ug A3 priority sa Lapu-Lapu City ang nahatagan na og Pfizer vaccines diha sa Chong Hua Hospitals kun diin gibutang ang bakuna tungod sa cold-storage facility niini. Ang A2 mao ang mga senior citizens ug ang A3 mao kadtong dunay gihambing mga sakit. Samtang sa Dakbayan sa Talisay, 100 ka A2 ug A3 ang gikatakdang bakunahan gamit ang Pfizer sunod semana ug ihatud gihapon sila ngadto sa Chong Hua Hospital matud pang Mayor Gerald Anthony “Samsam” Gullas.
Giklaro sab ni Gullas nga random ang pagpili kung si kinsa ang makadawat sa bakuna nga naa sa masterlist.
Sa talaan sa Talisay City Health Office (Mayo 26, 2021) naa na sa 4,235 ang nakadawat sa first dose sa bakuna samtang 717 ang naka second dose.— Gabriel Bonjoc/IBM (BANATNEWS)
- Latest
