Basura maoy hinungdan sa baha sa Bulacao
CEBU, Philippines — Daw nahimong jetski ang mga sakyanan nga niagi sa N. Bacalso Avenue sa Barangay Bulacao, Dakbayan sa Talisay tungod sa kataas sa tubig baha atol sa pagbunok sa uwan kagahapong adlawa.
Si Kapitan Banjo Abastillas nagkanayon nga aduna na silay flood control system gihimo ug nasuwayan gyud kini kagahapon kun mosalir ba. Apan bisan pa niini nilapaw ang tubig tungod kay nabuni sa basura ang mga kanal. Nisuyla sab ang tubig sa sapa nga niabot og tuhod.
Ang Aksyon Agad sa siyudad misungasong sa uwan aron pagtangtang sa mga basura diha sa kanal hangtud milurang ang tubig paglabay sa 30 minutos.
Si Abastillas nihangyo sa mga Talisaynon nga dili na magpataka og labay sa basura kay mobalik ra gihapon kanila ang negatibong epekto sa ilang wala pagpakabana.
Si Mayor Gerald Anthony “Samsam” Gullas nahibulong sanglit sa miaging mga buwan nga adunay pag uwan wala man mobaha ingon adto kalawom tungod kay duna may flood control system nga gibuhat ang DPWH.
Apan natingala siya karon ug iyang gibasol ang mga basurang nabara sa mga kanal.
Ang maong baha nakaaberya sa biyahe sa mga sakyanan ug daghan sab ang napagngan.
Sumala pa ni Gullas, kung magtinabangay ang tanan masulbad ra gayud ang maong problema sa baha.— Rowena D. Capistrano/IBM (BANATNEWS)
- Latest
