Cebu City nangandam na alang sa vaccine rollout sa sunod buwan

CEBU, Philippines — Nangandam na ang mga opisyales sa Siyudad sa Sugbo sa umaabot nga lapad nga pagpamakuna sa publiko nga gikatakdang mahitabo sa buwan sa Hunyo.

Si Cebu City Councilor Dave Tumulak ug Cebu City Health Officer Dr. Jeffrey Ibones miingon nga duna nay abiso gikan sa nasudnong kagamhanan nga mangandam na sa lapad nga pagpamakuna.

Si Tumulak miingon nga nangita sila karon og dugang vaccination sites.

“Duna na tay tulo on stand by nga ma vaccination centers para na sa mass rollout sa atong vaccination. Giawhag gihapon namo magpa-register unya stay put lang sa ilang mga barangay kay ato man sad gitan-aw pud ang mga possible areas nga dili layo para nila,” si Tumulak nagkanayon.

Si Ibones sa iyang bahin miawhag sa mga residente sa siyudad nga magparehistro online aron malakip sila sa masterlist.

“Maghangyo lang ‘ta sa atong kaigsuonan nga magpa-register lang gyud ta kay dili man ta tagaan og vaccine kung wala ta ma register. Ang basehan sa Department of Health ang bakuna ra nga na-register sa ato, for example naay na-registered 50,000 mao ra sad nay bakuna ilang ihatag dili man pwede molapas kay naa man ubang LGU nga nagpalista pud sila,” pasabot ni Ibones.

Sigon ni Ibones moabot sa 35,000 ka indibidwal na ang  nabakunahan na.

Gitinguha sa siyudad nga mabakunahan ang 700 mil ka residente sa siyudad tungod kay 70 percent man sa populasyon ang gikinahanglang mabakunahan aron makab-ot ang herd immunity.

Pagkakaron anaa pa lang sa 130 mil ang nakaparehistro nga gustong magpabakuna.

Gawas sa pagdugang og vaccination sites nagkinahanglan sab sila og dugang mga tawo nga motabang sa pagpamakuna.

Ang siyudad naapil sa priority area sa national government alang sa distribution sa COVID-19 vaccines.

Sa pikas bahin, ang Cebu City adunay 24,134 total cases sa COVID-19 human nakatala og 30 ka bag-ong kaso ug 465 niini ang aktibo sumala pa sa Department of Health Central Visayas.

Sa pikas bahin, gisusi na sab sa Talisay City Health Department ug Disaster Risk Reduction and Management Office ang duha ka mga malls sa dakbayan nga posibleng himuong dugang nga vaccination sites.

Si Dr. Rey Cesar Bautista miingon nga ilang gipaspasan ang pagpangita og dugang vaccination site human si Mayor Gerald Anthony “Samsam” Gullas nimando niini nga sa huwan sa Hunyo masugdan na nila kini og gamit.

Gawas niini, gipahibalo ni Gullas nga magkuha sila og dugang 10 ka mga nurses nga maoy mo man sa vaccination sites.— Gabriel Bonjoc/IBM (BANATNEWS)