Mga police station sa probinsiya pabutangon og community pantry

CEBU, Philippines — Gipaniguro ni Police Colonel Engelbert Soriano, direktor sa Cebu Provincial Police Office nga magbaton og community pantry ang kapolisan sa Probinsiya sa Sugbo.

Matud ni Soriano karong Mayo 15, 2021 kinahanglang aduna nay mga community pantry ang mga estasyon sa kapolisan sa probinsiya ug aduna usab silay kaugalingong backyard gardening lakip ang provincial headquarter.

Gibutyag ni Soriano nga kong adunay mohatag og donasyon sa mga community pantry sa mga police station gikan sa mga manggihatagon nga mga tawo dili nila kini balibaran ug mahimo kining ideretso sa police station diha sa lugar nga ilang nahimutangan.

Samtang si Padre Alex Cola, pangulo sa Cebu Caritas Inc. sa Archdiocese of Cebu nagkanayon nga magpadayon karon ang ilang Caritas Kindness nga gipang-apod-apod nila sa kadalanan.

Niadtong Miyerkules maoy unang adlaw nila sa maong kalihokan diin wala mapugngi ang paghugop sa mga tawo nga naggikan sa nagkalainlaing barangay.

Gibutyag ni Cola nga nagtigom pa sila karon alang sa dugang mga pamaagi aron ang Caritas Kindness padayon sa pag-operate nga dili molapas sa mga gipatuman nga minimum health standard.

Lakip sa Caritas Kindness ihatag usab nila ngadto sa katawhan ang values education.

Sa laing bahin, makabaton  na og bag-ong 4-storey building police station ang kapolisan sa Dakbayan sa Danao.

Nasayran nga mokabat ngadto sa P80 milyones nga kantidad nga igahin sa maong proyekto diin maggikan kini sa panudlanan sa lokal nga kagamhanan sa siyudad.

Si Police Lieutenant  Maria Theresa Macatangay, hepe sa kapolisan sa maong dakbayan nagkanayon nga ang ground breaking ceremony nga himuon karong adlawa tambongan kini sa kadagkoan sa kapolisan sa rehiyon ug ulohan nilang buhatan ug sa opisyales sa Probinsiya sa Sugbo. —Romeo T. Limpangog/ BDB (BANATNEWS)