Fire truck sa Calamba didto gi-turnover sa MILO?

CEBU, Philippines — Niabot ngadto sa 15 ka balay ang naugdaw sa nahitabong sunog kagahapon sa kadlawon diha sa Sitio Mahayahay 2, Barangay Calamba, Dakbayan sa Sugbo.

Gibana-banang nikabat ngadto sa P300,000 ang danyos sa nahisgutang sunog

Nadawat sa Cebu City Fire Office ang alarma sa sunog alas 2:45 sa kadlawon kagahapon ug gisaksa kini sa second alarm.

Ang kayo sa sunog nakontrolar kini alas 3:26 sa kadlawon ug pag-alas 3:32 gideklarar kini og fire out sa kabomberohan.

Subay niini, si Calamba Barangay Captain Victor Quijano nagkanayon nga adunay fire truck ang barangay nga gi-turnover sa kagamhanan sa Dakbayan sa Sugbo apan gipangayoan una sila og mga personnel aron maoy mo operate sa fire truck.

Matud ni Quijano nga naghatag sila og crew nga adunay certificate of competency tungod kay mao kini ang gipangayo kanila.

Apan giingong ang fire truck didto gi-turnover sa Mayor’s Information and Liaison Office (MILO) hinungdan nga dili kini ma-release tungod kay walay tawo nga kahibawo mo-operate sa fire truck maong na-hold.

“Mao na pangutana nako ngano pa man kinahanglan mag-train og crew which is naa na may crew nga gi-hire sa Barangay?, ang ila lang is ilang i-turnover sa MILO ngano pa mang huna-hunaon na nga MILO or barangay ba nga klaro nga estorya kong disaster man gani wala man gyu’y pilion ana, either unsay kolor nimo ug unsay kolor sa maigo sa sunog”, matud ni Quijano.

Si Quijano nanghinaot nga motug-an ang siyudad nga ang fire truck naa sa MILO ug wala sa barangay.

Nasayran nga adunay upat ka bag-ong fire truck nga gi-turnover ang Cebu City sa upat ka barangay sa siyudad diin apil na niini ang Calamba apan giingong wala kini madawat sa barangay.

Ang mga nasunogan gihatagan na og hinabang sa barangay sama sa bugas, delata ug uban pa ug nanghinaot usab si Quijano nga ang siyudad mohatag usab og ayuda sa mga nasunogan sama sa pack meals ug trapal aron temporaryong magamit nila nga kapasilongan. —Rowena D. Capistrano/BDB (BANATNEWS)