Lalaki nakuryentihan, bata nalumos sa Toledo

CEBU, Philippines — Usa ka 27-anyos nga lalaki ang nakalas human kini nakuryentihan sa may Sitio Daspo, Barangay Das, Toledo City, samtang usa ka 8-anyos nga bata sab nga nangaligo sa swimming pool ang nalumos sa Brgy. Cantabako sa mao gihapong siyudad.

Ang nakuryentihan mao si Romel Soon, residente sa maong lugar.

Base sa initial nga imbestigasyon nila ni Police Staff Sergeant Alexander Dimco giingong namutol sa mga sanga sa Gemelina nga kahoy si Soon kay gisugo kini sa usa ka Joel Barquio sa Jesus Christ the Bondage Breaker End Times Ministry Church.

Apan aksidente niyang naapil og tigbas ang linya sa kuryente hinungdan nga kini nakuryentihan ug nakaingon sa iyang kamatayon.

Ang mga tinugyanan sa CDDRMO, Toledo City Bureau of Fire Protection, Toledo City Fire Station ug uban pa nagtinabangay sa pagkuha kaniya didto sa ibabaw sa punoan sa kahoy diin kini nasangit.

Samtang sa Cantabco, nakalas ang 8-anyos nga si Chezka Jane Socorro, residente sa may Sitio Andam, Barangay Das sa maong siyudad human  kini nalumos sa swimming pool kauban ang mga silingan.

Matud pa nalinga ang mga hamtong nga kauban niini tungod kay nangandam sa ilang pagkaon ug walay nakamatikod nga miadto kini sa lawom nga bahin sa swimming ug nalumos.

Nahibaw-an lang ang nahitabo sa bata sa dihang milutaw kini sa tubig ug wala nay kinabuhi.

Gidala pa unta ang bata diha sa Carmen Copper Hospital apan gideklarar kini nga dead on arrival sa attending physician Dr. April Jean Gapo.

Ang kapulisan padayon pang naghimo og imbestigasyon may kalabutan sa maong mga insidente. —IBM (BANATNEWS)