Mga healthworkers wala pa mahuman og bakuna
CEBU, Philippines — Sa dili pa makapadayon sa laing grupo nga kwalipikadong bakunahan batok sa coronavirus humanon una sa Cebu City Health Department ang pagbakuna sa tanang medical frontliners sa siyudad.
Base sa listahan sa Cebu City Health Department naa sa kapin 6 mil ka mga medical frontliners sa dakbayan ang kinahanglang bakunahan apan sa pagkutlo ning balita kapin 3 mil palang ka mga frontliners ang nabakunahan.
“Wala paman to nakompleto sa atong first dose kay naa tay mga 6,000 ka buok nga na-register nga healthcare workers, so naa pata sa mga 3,000 plus so we are expecting more pa,” matud ni Dr. Ilya Tac-an, pangulo sa Vaccine Operating Center.
Kagahapong adlawa nakadawat og dugang 105 ka bakuna nga Sinovac vaccine ang CCHD gikan sa Department of Health Central Visayas ug nahurot dayon kini pagbakuna sa mga medical frontliners nga nagpalista.
“Hopefully matagaan nata karon nga week kay mao may gisaad sa Department of Health nato para mahuman nani atong mga healthcare workers para magsugod nata sa sunod nga stage A2 ug A3,” sigon ni Dr. Jeffrey Ibones, pangulo sa CCHD.
Ang nanglangkob sa A2 ug A3 mao ang mga senior citizens, members sa 4Ps apil sab kining mga dunay comorbidities o kadtong masakiton. Matud ni Ibones, ang dunay comorbidities magkinahanglan og medical certificate sa ilang doktor una sila hatagan og bakuna.
Usa sa suliran karon sa CCDH ang pagkombinsir sa mga tawo nga magpabakuna gyud.— IBM (BANATNEWS)
- Latest
