Drayber giilogan og taksi, nabun-og
CEBU, Philippines — Nihuboy ang nawong sa usa ka taxi drayber human siya gibunalan sa karnaper nga nagpakaaron- ingnon nga pasahero diha sa Cebu South Coastal Road (CSCR) sa Barangay San Roque, Dakbayan sa Talisay Domingo sa tungang gabii.
Ang biktima naila nga si Jose Belia, 32, drayber sa Ken Taxi nga lumad nga taga lungsod sa Argao.
Sa inisyal nga imbestigasyon sa kapulisan gipara sa gikatahapan ang biktima maong gihunongan niya kini, apan sa pagsud sa taksi kalit siyang gibunalan og magahi nga butang diha sa nawong ug sa nagkadaiyang parte sa iyang lawas.
Nisuway sa pagsukol ang biktima hangtud nga siya nakagawas sa taxi ug nangayo og tabang. Apan ang lalaking gibanabanang 5’4 ka tiil ang barog nibanos sa manobela ug nisutoy og padagan.
Igo nalang pagdangop sa kapulisan ang biktima nga niburot ang dagway gumikan sa mga bun-og nga naangkon. Padayon pa ang kapulisan sa pagsubay sa krimen.— IBM (BANATNEWS)
- Latest
