Mga nag-home isolation ipakuha gyud sa EOC

CEBU, Philippines — Gimandoan ang Cebu City Emergency Operations Center nga panghutdon og kuha gikan sa ilang mga panimalay ang tanang mga nagpositibo sa Covid-19 sa Dakbayan sa Sugbo, nga kasamtangang nag home isolation.

Si retired general and Inter-Agency Task Force (IATF) chief implementer for the Visayas Melquiades Feliciano atol sa tigum sa Cebu Citizens Initiative kagahapong adlawa nga gitambongan sa mga opisyales sa gobiyerno ug lokal nga kagamhanan.

Matud pa ni Feliciano, tungod sa padayon nga pagsaka sa kaso sa Covd-19 aduna gayud mga backlog nga positive nga wala pa makuha sa ilang panimalay ug padayon naka home isolate.

Giangkon niya nga naglisod ang tigkuha sa mga napositibo kay adunay uban nga nagka Covid-19 apan kusganong mihimakak sa tinuod.

Dunay uban nga nag-usab sa ilang mga address ug contact numbers maong lisud gyud silang tultolon. Tungod niini nagpatabang na sila sa mga barangay kapitan.

Awhag ni Feliciano sa tanan nga padayonon gihapon ang pagsunod sa mga minimum health standards ug health protocols,aron makalikay sa maong sakit.

COVID-19 update

Base sa datos nga gipagawas sa Department of Health Central Visayas niadtong Miyerkules, Pebrero 24 ang Cebu City nakatala og 263 ka bag-ong nangaayo gikan sa maong sakit.

Sa pagkakaron, 13,057 na ang total recoveries niini ug naa na sab sa 727 ang deaths human dunay usa nga nadugang.

Apan may natala sab ang siyudad nga 234 bag-ong kaso sa COVID-19 mao nga ang siyudad duna nay 16,904 total cases ug ang 3,120 niini active cases.

Ang Mandaue City dunay 774 active case sa COVID-19. Naa na sab sa 3,932 ang total cases niini human 34 ang nadugang.

Ang recoveries sa siyudad naa sa 2,976 tungod adunay 17 ka bag-ong nangaayo samtang usa ang dugang nakalas maong nahimo na kini karong 182.

Samtang ang Lapu-Lapu City dunay 720 active cases sa COVID-19. Niabot na sab sa 3,920 ang total cases sa dakbayan kay nakatala og 89 ka bag-ong kaso sa virus.

Ang Lapu-Lapu karon aduna nay 3,080 recoveries kay 12 ang additional reported recoveries ug 120 ang nakalas human napun-an og usa nianang adlawa.

Sa datos sa Department of Health(DOH)-7 ang Central Visayas duna nay 37,396 total cases sa COVID-19; 6,433 ang active cases; 29,410 ang recoveries ug 1,553 ang deaths.— Decemay P. Padilla/IBM (BANATNEWS)