Garcia dili motugot mobalik og lockdown

CEBU, Philippines —  “Don’t mess with us.” Mao kini ang bahad ni Cebu Governor Gwendolyn Garcia human nga tulo ka consultants ang nirekomendar nga ipaubos ang Sugbo sa lockdown tungod sa matud pa pagsaka og balik sa mga kaso sa coronavirus.

Atol sa iyang live press conference niadtong Pebrero 19, 2021 sa gabii, tulo ka medical consultants ang nirekomendar ngadto kang Health Secretary Francisco Duque III nga ipaubos ang Sugbo sa mas estriktong community restriction tungod sa nagsaka nga kaso sa coronavirus disease ug sa bag-ong mutation sa Covid-19 nga na-detect sa Sugbo.

Wa ginganlan ni Garcia ang maong mga consultants apan, usa nila ang matod pa nirekomendar usab nga dili palargahon ang mga Sugboanon gawas sa Sugbo. Gihulagway kini ni Garcia nga "diskriminasyon" ngadto sa mga Sugboanon.

Gitataw usab sa gobernador nga walay "Cebu variant" sukwahi sa gitermino sa uban sa duha ka mutations nga na detect sa Sugbo nga karon "subject for futher investigation" pa.

Sumala hinuon sa gobernador wala mouyon si Sec. Duque sa maong rekomendasyon human nga si DOH-7 regional director Jaime Bernadas Jr. ug Dr. Mary Jean Loreche ang tigpamaba sa DOH-7 nipresentar sa Covid-19 situation sa Sugbo ug nagkanayon nga "manageable" pa ang sitwasyon.

Sumala ni Garcia nga walay kausaban sa quarantine protocols sa Probinsya taliwala sa na detect karon nga mutations.

“No, because everything is already in place. Usa na ta ka tuig ani, established na ang isolation centers, contact tracers..” matud sa gobernador.

“Don’t mess with us. We can take care of ourselves. I will not, and never again accept a lockdown. I’ll fight for Cebu and the Cebuanos because Cebu is moving on and moving forward,” pamahayag ni Garcia.

Ang gobernador nagkanayon nga kun mag lockdown, daghan na usab ang mga negosyong manira ug daghan ang maapetkohan ug mawad-an ang trabaho.

Ang Kapitolyo, padayong naghinayhinay pagbuhi balik sa ekonomiya sa Probinsya apil na niini ang pagbukas sa domestic tourism.

Sa Lunes, Pebrero 22, 2021 gikatakda nga moluwat si Garcia og Executive Order kalabot sa pagdawat og mga turista gikan sa ubang Probinsya.

Nakigtagbo ang gobernador karong adlawa uban sa mga tour operators, airline companies lakip na MCIAA, GMR-Megawide ug ubang tourism stakehokders kon diin gihisgotan ang domestic tourism sa Probinsya sa Sugbo.

Sa pikas bahin, si Mayor Junard “Ahong” Chan sa Dakbayan sa Lapu-Lapu mipadayag sab nga dili kini pabor nga ibalik sa lockdown ang siyudad  ug nipagawas hinuon siya og bag-ong executive order aron pahugtan ang pagpatuman sa mga health protocols sugod kagahapong adlawa hangtud sa Pebrero 27.

Gidili tanan ang pagbaligya og ilimnon nga makahubog, karaoke, parties, pagpamista, sabong, tanan mga contact sports activities, non-essential mass gatherings ug pag operate sa mga internet café.

Ipatuman sab ang curfew alas-10 sa gabii ngadto sa alas-5 sa buntag gawas lang sa mga empleyado nga nagtrabaho sa maong mga oras. Kinahanglan lang sila magdala og identification cards o certificate of employment pamatuod nga padulong o gikan sila sa trabaho.

Bawal gihapon mogawas ang 15-anyos paubos ug 65-anyos pataas, matud pa sa mayor.— Romeo Limpangog, Rowena D. Capistrano/IBM (BANATNEWS)