Asawa ni Barok Alvaro gipatay
CEBU, Philippines — Patay ang asawa sa giilang drug lord nga si Alvaro ‘Barok’ Alvaro sa mga armadong lalaki nga kalit lang misulod sa ilang balay ug gipusil kini diha sa Purok 1, Barangay Timobo, Dakbayan sa Danao alas 3 ang takna sa miaging kaadlawon
Si Police Lieutenant Colonel Maria Theresa Mactangay , hepe sa kapolisan sa Danao City Police Station miila sa biktima nga mao si Alma Lato Alvaro, 40.
Si Police Staff Sergeant Fernando Gonzales sa Danao City Police Station miingon nga base sa pamahayag ni Arnel Lavador Lato, igsoon sa biktima naabtan sila og kaadlawon sa pagkanta-kanta sa videoki tungod nagsaulog sila sa Valentines Day.
Naabtan sila og kaadlawon ug kalit lang nga dunay upat ka wala mailhing mga lalaki nga mimando kanilang tanan sa paghapa.
Usa sa mga lalaki ang miguroy sa biktima buwag sa uban ug didto nadungog nalang nila ang sipang buto sa armas. Human sa hitabo, daling nanglakaw palayo ang mga mamumuno.
Naigo sa nawong ug sa ulo ang biktima ug dali nila kining gidala sa tambalanan apan gideklarar kini nga patay na.— IBM (BANATNEWS)
- Latest