Cebu LGUs, naapil sa vaccine solidarity trials sa WHO

CEBU, Philippines — Pipila ka mga local government units sa Metro Manila, Davao City, Cebu ug Cavite nalakip sa implementasyon sa vaccine solidarity trial nga gimugna sa World Health Organization (WHO).

Ang Department of Interior and Local Government (DILG) miawha aning maong mga LGUs nga suportahan kining WHO vaccine trials, ilabi na sa mga barangay level kay didto magagikan ang 15,000 ka volunteers nga magpabakuna.

“Inaasahan po namin ang inyong buong suporta at pakikiisa upang maging matagumpay ang mga vaccine trials sa ating bansa. Ipakita po natin ang tunay na diwa ng bayanihan sa ating patuloy na pagtugon sa pandemiyang ito,” matud pa ni DILG spokesperson Undersecretary Jonathan Malaya sa gipagawas niining pamahayag.

Ubos sa WHO solidarity trial  ang mga bakunahan magagikan sa top five ngadto sa top 10 barangays sa mga LGUs nga adunay daghang kaso sa Covid-19 base sa record sa Department of Health - Bureau of Epidemiology (DOH-EB).

“We need the full support of our LGUs since trial sites will be at the barangay level and randomization will be by households. The household census will also be obtained from the barangays to ensure follow up,” matud niya.

Ubos sa DILG Memorandum Circular (MC) No. 2021-011, ang mga LGUs gimandoan sa paggahin og dapit ug suporta (di kinahanglang kwarta o pundo) aron magmalampuson ang vaccination trial. Apil niini ang transportasyon sa mga partisipanteng bakunahan, screening, vaccination, ug scheduled follow-up visits.

Ang mga LGUs patabangon sa pagpangita sa mga partisipante nga wala na mobalik alang sa scheduled visits, o modala sa partisipante sa tambalanan kun pananglitan dunay side-effect ang bakuna kanila.

Samtang ang DILG regional offices  sab gimandoan paghatag og binuwang report bahin sa dagan o resulta sa maong COVID-19 vaccine trials sa ilang lugar.

Ang DILG  ug Department of Science and Technology (DOST) mipirma na og memorandum of agreement bahin sa zoning and implementation sa COVID-19 vaccine trials sa mga piniling LGUs.

Posible sab nga dunay mga  trial zones nga diin tugotan ang mga pribado o independenteng clinical trials nga buhaton sa mga vaccine companies  aron pagsigurong patas ang tanan sa distribusyon sa unsa nga bakuna ang mahimong gamiton.

Matud ni Malaya nga kining vaccine solidarity trials gamiton lang alang sa pagsusi sa kaepektibo ug kun unsa ka luwas gamiton ang gisuwayang bakuna.

Ang mga volunteers nga magpabakuna nag-edad 18 hangtud 48 anyos subay sa pagbuot sa WHO.