Lalake patay human madasmagi og trailer truck

CEBU, Philippines — Patay ang usa ka 30anyos nga lalaki human kini madasmagi sa usa ka trailer truck sa may Sitio Lacaron, Barangay Pitalo, Lungsod sa San Fernando, Cebu.

Ang biktima kinsa nagmaneho sa iyang motor naila nga si Dindo Aguanta, residente sa maong lugar.

Samtang ang driver sa trailer truck padayon pa nga gipangita human gibiyaan ang biktima base sa CCTV nga nakita sa kapolisan.

Matud pa ni Police Corporal Jhonri Lacay, imbestigador sa San Fernando Police Station, nadawat nila ang maong alarma alas dies kwarentay singko ug dako ilang pagtuo nga nahitabo ang disgrasya alas dies y media.

Dugang pa ni Lacay, nagbiyahe sa managlahi nga direksyon ang maong biktima ug trailer truck sa dihang pag abot sa nahisgutang lugar, napunggit sa sakyanan ang gimaneho ni Aguanta.

Sumala pa ni Lacay, tungod sa impact natumba ang motor ug didto nalatayan ang paa sa biktima.

Ang biktima dali nga gidala sa tambalanan ug ang pamilya niini mao ang nipahibalo sa kapulisan nga nakutloan kini sa iyang kinabuhi. —MEL (BANATNEWS)