Brgy Poblacion sa Talisay midasig sa mga molopyo pagpananom

CEBU, Philippines — Bisan pa sa kahagip-ot sa ilang lugar nakahimo gihapon sa pagpananom ang taga Barangay Poblacion, Dakbayan sa Talisay.

Si Kapitan Edward Alesna nibutyag nga lisod ang ilang paglihok-lihok tungod sa kagamay sa ilang lugar apan gihimo niya mao ang pagbahin-bahin sa lugar nga ilang matamnan.

Sukad sa pagsugod sa pandemya ang pagpananom maoy usa sa ilang gikalingawan ug ilang gipaambit sa ilang mga konstituwenti.

Suma pa ni Alesna nga wa usab sila balibari sa rehiyonal ug lokal nga buhatan sa Agriculture aron sila hatagan og mga binhi ingon man pagtudlo kung unsaon sa pagtanom.

Ginamit ang mga plastik ila kining gitamnan ug gipahimutang sa ilang nursery garden.

Ang uban nga mga liso sa utanon ila usab nga gipaambit sa matag purok aron ang bunga ilang mapahimuslan ilabi na sa kalisod sa panahon sa pandemya.

Nadungagan sab ang ilang mga liso human ang Probinsya sa Sugbo nihimo sa Sugbosog nga proyekto. —MEL (BANATNEWS)