40 ka panimay naugdaw sa Talisay
CEBU, Philippines — Miabot sa 40 ka panimay ang naugdaw sa sunog sa Sitio Kawayan, Barangay Lagtang, Dakbayan sa Talisay kagahapon sa kaadlawon. Tubag kini sa sunog sab nga nahitabo sa usa ka pabrika sa pintal sa Dakbayan sa Mandaue niadtong Huwebes sa kaadlawon nga milanat og 13 ka oras.
Ang sunog sa Talisay nagsugod mga 1:36 sa kaadlawon ug kini nagsugod sa panimay ni Rene Bautista. Apan usa ka ginganlan og Rommel maoy nag-abang sa ilang panimay nga niadto pa sab Noboyembre sa miaging tuig nilarga padung sa Bohol.
Walay tawo ang balay sa dihang nahitabo ang sunog. Si Lugen Bacus, nibutyag nga tapad ang ilang panimay sa nasunog. Nakamata siya gumikan sa kainit sa palibot ug sa iyang pagmata dakong kayo na ang nisugat kaniya. Si Fire Chief Insp. Arnel Abella niingon nga ila pa nga sutaon kung unsa hinungdan sa sunog. Gibana-bana nila nga P2 milyones kapin ug kulang ang danyos sa sunog.
Si Kapitan Chester Salceda nagkanayon nga 50 ka pamilya ang naapektahan sa sunog. Hinungdan nga sila mideklarar na og state of calamity aron magamit nila ang pundo sa calamity fund.
Ang mga nasunogan naa karon sa basketball gym dili layo sa lugar nga nasunog. Si Mayor Gerald Anthony “Samsam” Gullas Jr. nasubo sa balita ilabi na nga dili siya makabisita sa mga naapektahan tungod kay nagpaubos pa siya sa isolation human napositibo sa Covid-19.
Iyang gitahasan si acting mayor Alan Bucao ang tanan uban ni Felipa Solana, pangu sa City Social Welfare and Development (CSWD).
Sa pikas bahin, dili mominos sa P25 milyones ang danyos sa pagkasunog sa Treasure Island Corporation nga pabrika sa pintal diha sa Sitio Pilit, Barangay Cabancalan sa Mandaue City.
Walay nakalas o napaso sa hitabo sanglit wala makatapon sa kabalayan ang kalayo tungod sa habog nga kongkretong paril. Apan napiang si Fire Officer 1 Rosvic Susas atoll sa operasyon. Wala pa matino kung unsay sinugdanan sa maong sunog. –Rowena D. Capistrano/IBM (BANATNEWS)
- Latest
