“Online seller” gilugos sa customer

CEBU, Philippines — Usa ka 18-anyos nga nangangkong online seller nagpakitabang sa mga tanod sa Barangay Duljo-Fatima sa Dakbayan sa Sugbo ug mipasangil nga gilugos kini sa iyang kasabot nga kustomer nga usa ka crew sa catering services diha sa may Sitio San Juan, Alaska, Mambaling ning dakbayan sa Sugbo niadtong Miyerkules sa gabii.

Ang dalaga nangangkong namaligya kini og cellphone pinaagi sa online. Matud pa nagkasabot sila sa 24 anyos nga suspek nga paliton ang usa sa gibaligya niining cellphone sa presyo nga P3 mil.

Base sa imbestigasyon sa Mambaling Police Station giingong gipaadto sa suspek ang biktima diha sa balay sa suspek aron ihatud ang cellphone ug pik-apon ang bayad nga P3 mil.

Apan pagabot didto, giingong gilugos kini sa suspek hinungdan sa pagsumbong niini sa mga tanod. Ang suspek dali nga nadakpan sa mga tanod.

Apan ang lalaki sa pakighinabi sa Banat News hugtanong mihimakak sa alegasyon sa babaye ug sa pangangkon niining online seller kini og cellphone.

Matud niya nagbaligya sa unod ang maong babaye nga gipaagi lang ang transaksyon online.

Sumala pa niini, ang babaye miadto sa ilaha subay sa ilang kasabotan bugti sa pakighilawas sa presyong P3 mil.

Apan nalangay siya pagbayad kay wa pa kaabot iyang amigo nga nagdala sa kwarta nga iyang pangbayad. Apan nisumbong ang babaye sa mga tanod ug gibutang-butangan siya.

Ang Women’s Desk sa Mambaling Police Station naghimo pa og dugang imbestigasyon sa maong kaso.

Si Police Corporal Louella Abastas miawhag sa mga online sellers nga mas maayong diha sa mga pampubliko nga lugar o kaha sa mga barangay hall ug police stations ang meet up sa mopalit aron malikay sa mga mapahimuslanon.—IBM (BANATNEWS)