Mayor Chan miumol og team nga magmonitor sa mga establisamento

CEBU, Philippines — Miumol og composite team si Mayor Junard ‘Ahong” Chan nga magmonitor sa mga establisamento sa ilang siyudad kun nituman ba sa mga lagda kabahin sa health protocols.

Kini sa tinguha nga padayong mapatuman sa mga restaurants og ubang bay patigayon ang mga health ug safety protocols nga naglakip sa 50 porsyento nga capacity ug duha lang ka beer ang isilbi sa matag customer.

Namatikdan sa mayor sa miaging mga adlaw nga daghan na usab ang wa motuman sa mga lagda sa health protocols gumikan sa mga tapok-tapok.

Ang composite team gilangkoban sa mga personnel sa Philippine National Police, Licensing Office ug City Treasures Office. Suma pa ni Mayor Chan nga estrikto nilang ipatuman ang mga lagda nonot sa pagsaka sa kaso sa COVID-19.  Si Mayor Chan nakigtigum na sa mga barangay kapitan sa 30 ka barangay sa siyudad aron pangayuan og tabang sa pagmonitor sa mga establisamento sa ilang lugar nga wa motuman sa minimum health protocol. Samtang gitug-an ni Atty James Sayson sa City Legal Office (CLO) nga usa na ka establisamento sa Barangay Gun-ob ang ilang gisirado tungod sa paglapas sa health protocol. —Romeo T. Limpangog/MEL (BANATNEWS)