DepEd gihangyo nga ablihan og balik ang BIC
CEBU, Philippines — Si Konsehal Joel Garganera, deputy chief implementer sa Inter-Agency Task Force nibutyag nga atol sa ilang meeting nihangyo sila sa Department of Education nga ablihan og balik ang Barangay Isolation Center.
Kasamtangan ang siyudad karon adunay tulo ka Barangay Isolation Center nga naa diha sa Barangay Zapatera, Mabolo ug Labangon.
Atol sa meeting sa EOC ug DepEd walo ka eskwelahan ang ilang gitan-aw nga buksan og balik isip dugang sa mga BIC sa Labangon, Mabolo ug Zapatera.
Matud ni Garganera nga gihimo nila kini isip pagpangandam kon modaghan og balik ang kaso sa COVID-19 sa Siyudad sa Sugbo.
Base sa datos nga gipagawas sa Department of Health (DOH)-7 kagahapon, ang Cebu City nakatala og 142 ka bag-ong kaso hinungdan nga niabot na ngadto sa 12,789 ang kinatibuk-ang kaso sa siyudad.
Niabot na usab ngadto sa 1,613 ang active cases sa siyudad, 10, 475 ang kinatibuk-ang recoveries lakip niini ang 32 nga ulahing nadugang ug 701 ang gidaghanon sa namatay.
Nunot sa padayon nga pagsaka sa kaso, si Garganera subling niapelar sa katawhan nga mosunod sa basic health protocols. —BDB (BANATNEWS)
- Latest
