50 nadugang nga kaso sa COVID-19 sa Cebu City

CEBU, Philippines — Nikabat ngadto sa 50 ka bag-ong kaso sa COVID-19 ang nadugang nga bag-ong kaso sa COVID-19 sa Dakbayan sa Sugbo.

Kini base sa datos sa Department of Health (DOH)-7 nga gipagawas niadtong Miyekules.

Ang siyudad aduna na kini 11,241 ka kintibuk-ang kaso diin sa maong gidaghanon 460 niini ang active cases. Si Konsehal Joel Garganera, deputy chief implementer sa Inter-Agency Task Force Emergency Operations Center Cebu City nagkanayon nga ang pagsaka sa kaso gilaoman na nila.

Matud ni Garganera nga ang mga nagpositibo ilaha dayon kining na-isolate, ang balay na-lockdown na ug ang miyembro sa panimalay na swab test na usab.

Si Garganera nagkanayon nga bisan og 50 ang natala nga bag-ong kaso apan ang na-test niabot ngadto sa  1,250 ug ang positivity rate sa siyudad naa sa kwatro porsyento ubos kini sa singko porsyento nga standard rate sa World Health Organization.

Samtang sa mortality rate o nangamatay niadtong buwan sa Disyembre upat lang ang natala sa Cebu City apan sa buwan sa Enero sulod lang sa 14 ka adlaw siyam ang natala nga namatay.

Samtang gipahibawo sa Emergency Operations Center Cebu City nga niabot na sa 55 ka medical frontliners ang nagpositibo sa COVID-19 diin kasagaran nila mga doctor ug nurse ug nakuha nila ang virus diha sa ilang pagtrabaho.

Subay niini nikabat ngadto 123 ka bag-ong kaso sa COVID-19 ang natala sa Central Visayas sa Enero 13, 2021.

Gawas sa Cebu City, ang Dakbayan sa Lapu-Lapu aduna kini siyam 9 ka bag-ong kaso, upat sa Mandaue, usa sa Probinsiya sa Bohol, 36 sa Probinsiya sa Sugbo ug 23 sa Negros Oriental. Ang active cases nisaka ngadto sa 1,440 samtang ang recoveries anaa sa 23,056 human lakip niini ang 14 nga ulahing nadugang.

Ang cumulative total sa COVID-19 sa rehiyon-7 anaa sa 25,941 ug 1,445 ang namatay. —Le Phyllis F. Antojado/BDB (BANATNEWS)