Buddy system polis ug CT-TODA ipatuman sa Dakbayan sa Talisay

Cebu, Philippines — Makita na unya ang polis sa Talisay ug sakop sa City of Talisay-Traffic Operation Development Authority (CT-TODA) nga mag-uban diha sa kadalanan aron pagbantay ug pagmando sa trapiko.

Kini maoy gipahibawo ni Mayor Gerald Anthony “Samsam” Gullas Jr.aron mas epektibo ang pagmentinar sa kahapsay ug kalinaw sa siyudad lakip na ang pagpatuman sa minimum health protocols.

Si Police Major Gerard Ace Pelare ug si Jonathan Tumulak, traffic czar nagkauyon nga ilang himuon ang buddy system.

Ang mahitabo niini mao ang pagkuyog sa polis ug enforcer diha sa kadalanan aron kung unsa man ang alarma nga mahitabo paspas ang ilang pagresponde.

Matud pa ni Pelare nga dako kini og epekto sa natad sa kahapsay ug kalinaw ilabi na nga nagsingabot ang kapaskuhan.

Samtang si Tumulak nitataw nga modungag sa kumpyansa sa enforcer ang ilang gibuhat tungod kay naa may polis nga mag-uban kanila.

Ang CT-TODA ug polis maoy mag una nga pwersa sa pagpatuman sab sa guidelines sa IATF ilabi na nga sugdan na ang Misa de Gallo.