4,000 modernized jeepneys madugang sa 2021

CEBU, Philippines — Dugang 4,000 ka modernized jeepneys ang gipaabot nga magdagan sa probinsya sa Sugbo ug sa mga highly urbanized cities niini sa sunod nga tuig sumala pa sa opisyal sa Land Transportation Franchising and Regulatory Board-7.

Matud ni Eduardo Montealto, Jr., regional director sa maong ahensiya nga gihatagan lang ang mga jeepney operators kutob Disyembre 30 nga sila maggrupo o mopasakop og transport cooperative.

“Until December 30 of this year ang deadline sa consolidation but after that we will still give them another one year to operate. Pero among ihatag kay provisional authority na lang dili na franchise. Kung naay qualified nga mo apply sa ilang franchise, then we will give it,” si Montealto miingon.

Sa pagkakaron, 60 ngadto sa 70 porsiyento sa operators sa mga  traditional jeepneys sa Central Visayas ug sa Cebu naggrupo-grupo na ug nagpadagan na karon aning modernized jeepneys.

“Eventually ang traditional jeepneys mawala gyud na kay ang mga operators are now operating the modernized jeepneys,” pasabot pang Montealto.

Matud niya duna na karoy 299 modernized PUJs ug 119 bus nga nagdagan na sa Cebu City ug laing 79 ka bus sa tri-cities sa Cebu, Mandaue ug Lapu-Lapu.

Karong buwana gipaabot nga madugangan pa kini og 20 ka modernized jeepneys. Duha ka semana na ang nakalabay dunay nadugang nga 50 modernized jeepneys nga gipadagan sa MEPZ sa Lapu-Lapu City padung sa Cordova ug vice versa.

Pagkakaron, duna pay binagsa nga mga operators nga nagkuha og permit nga maka operate.

Sukad nga gilusad ang balik-pasada sa Cebu City duna na karoy 244 TPUJs nga nagdagan human gitugot na sa LTFRB ang inter-city routes ug inter-municipality routes apan sa pangutanang makasulod ba sa Cebu City kinahanglan pa ang pagtugot ni Mayor Edgardo Labella.

“In principle, its already approved. But we still have to wait for the approval of Mayor Labella,” dugang pang Montealto.— The Freeman/IBM