Toledo, Carcar minus ang natala nga quarantine violators

CEBU, Philippines — Subsob na ang pagpangandam sa kagamhanan sa Siyudad sa Toledo samtang nagsingabot ang pasko ug ilang paneguro nga mapatuman gyud ang health protocols sa ilang lugar.

Suma pa sa information officer sa siyudad nga si John Rosseller Layan nga sukad sa miaging buwan, wala gyu'y natala nga quarantine violators sa ilang dapit.

Gidugang ni Layan nga hugot usab nga gituman sa katawhan ang curfew nga nagsugod sa alas 9 sa gabii hagtud sa alas 4 sa kadlawon.

Samtang nakigtagbo si Mayor Marjorie P. Perales ngadto sa lokal nga Inter-Agency Task Force ug lakip sa ilang nahisgotan ang paghingusog sa ordinansa nga nagmando sa pagsul-ob ug face mask.

Ang makasupak niini makamulta og P500 alang sa first offense , P1, 000 sa second offense, P1500 sa third offense ug P2, 000 sa fourth offense.

Sa report sa public information office sa Toledo, duna nalay 9 ka active cases sa COVID19,  gikan sa 362 nga natala nga kaso niini kaniadto.

Samtang mapasalamaton usab si Mayor Mercy Apura sa Dakbayan sa Carcar, ngadto sa mga Carcaranon, sa pagsunod sa iyang kamanduan nga nagdili sa mga bisita nga dili taga carcar atol sa fiesta ni St. Catherine de Alexandria Parish, niadtong adlaw nga Miyerkules.

Matud pa ni Apura, wala gayuy mga nilapas sa maong kamanduan ug dako iyang kalipay nga nisunod ug disiplinado ang katawhan sa pagtuman sa executive order.

Hinoon ang kapulisan nakadakop ug mga nakalapas sa curfew nga moabot ug 14 kabuok, diin usa niini ang 2nd offender.

Gitug-an ni Police Master Sergeant Von Tecson, Desk Officer sa Carcar Police Station, ang unang madakpan sa curfew makamulta ug 500 pesos o kaha 15 ka adlaw nga priso samtang ang 2nd offender 1,000 pesos o priso sulod sa 30 ka adlaw.

Dugang pa ni Tecson, ang curfew sa siyudad magsugod sa alas diyes sa gabii  hangtud sa alas singko sa kadlawon. —Rowena D. Capistrano/MEL (BANAT NEWS)