PNP niawhag sa katawhan sa pag-report batok sa scammers
CEBU, Philippines — Ang kapolisan sa Dakbayan sa Sugbo niawhag sa katawhan nga motaho kong adunay mga scammer nga buot mobiktima kanila.
Kini human nga ang kapolisan nakadawat og text messages nga adunay mga nangayo og donasyon alang sa mga biktima sa bagyo sa Luzon.
Matud ni Police Lieutenant Colonel Wilbert Parilla, deputy city director for operation sa Cebu City Police Office nga adunay mga nikatap nga text messages nga nangayo og donasyon alang sa mga biktima sa katalagman diin scam ang uban niini.
Si Parilla nagkanayon nga adunay mga taho kalabot sa scam apan walay mga nireklamo o niduol karon sa kapolisan kabahin niini.
Si Parilla niawhag sa katawhan nga kong adunay mga mangayo og donasyon labing maayo nga susihon una kini sa katawhan aron masuta kong lehitimo ba kini. Dugang ni Parilla nga maayo nga ipadangat nalang sa katawhan ang ilang donasyon ngadto sa legitimate nga grupo o organisasyon.
Sa laing bahin, si Parilla nagkanayon nga ang kapolisan nagpaabot sa guidelines sa bag-ong Chief PNP nga ipatuman panahon sa pasko.
Dugang ni Parilla nga adunay klase-klase nga pamaagi sa pagselebrar sa pasko ug kinahanglang sigurohon lang unya ang pagsunod sa tanang minimum health standard. —BDB (BANATNEWS)
- Latest
