Dugang mga kaso natala sa Cebu City

CEBU, Philippines — Nakatala ang Cebu City og dugang 18 ka bag-ong kaso sa coronavirus disease(COVID)-2019 base sa datos nga gipagawas sa Department of Health Central Visayas niadtong Biyernes, Nobiyembre 13, 2020.

Ang siyudad aduna nay 10,379 total cases sa COVID-19 diin 209 ang active cases.  Nakatala sab ang siyudad og lima ka additional reported recoveries, ang siyudad karon dunay 9,488 recoveries ug nagpabilin sa 682 ang deaths.

Ang Mandaue City nakatala og lima ka bag-ong kaso sa COVID-19. Niabot na sa 2,590 ang total cases sa COVID-19 sa siyudad diin 41 ang active cases. Nakatala sab ang siyudad og tulo ka dugang nangaayo ug  duna na silay  2,385 nga nakarekober samtang 164 ang nakalas. Samtang ang Lapu-Lapu City nakatala og walo ka bag-ong kaso sa COVID-19.  Ang siyudad dunay 2,502 total cases sa virus ug 79 ang active cases. Naa sab sa 2,315 ang recoveries ug 108 ang deaths sa dakbayan.

Sa datos sa DOH-7 ang Central Visayas dunay 23,079 total cases sa COVID-19 diin 902 ang active cases; 20,897 ang recoveries ug 1,370 ang deaths.—Decemay P. Padilla/IBM

Mga kawani sa gilungkab nga

buhatan gi-lie detector test

Gipaubos  sa lie detector test ang tulo ka mga kawani sa Local  Civil  Registrar (LCR) sa Dakbayan  sa Lapu-Lapu isip kabahin kini sa nagpadayon nga imbestigasyon sa kapolisan sa Presinto 3  sa Lapu-Lapu mahitungod sa pagpanglungkab sa maong buhatan niadtong Oktubre 12, 2020 ug gisakiyo ang kapin  sa P100,000 nga salapi.

Si Police Major Jaime Tolentino, hepe sa Presinto 3  sa LCPO miingon nga ang tulo maoy unang hugna sa gipahigayon nga lie detector test ug duna pay  dugang tulo pa ka mga kawani nga ilang ipaubos niini.

Gitataw niya nga kabahin lamang sa ilang imbestigasyon ang ilang gibuhat ug gipaabot pa usab nila ang resulta sa fingerprint matching sa nakuha nila sa crime scene.

Giklaro hinuon niya nga kining mga gipaubos sa test dili pa maisip nga suspetsado o person o interest sa nahitabo n tungod kay nagpadayon pa ang gihimo nilang imbestigasyon.

Ang maong buhatan usa lamang sa tulo ka mga buhatan sa city hall sa dakbayan nga gilungkab sa maging buwan.  Unang gilungkab City Social Welfare Office (CSWDO) ug Palace of Justice nga nahimutang sa bulag nga building sa sulod sa Lapu-Lapu City Hall compound.— /IBM (BANATNEWS)