Wirings sa stalls sa Carbon Marketadunay mga sub-standards

Cebu, Philippines — Tungod sa nahitabong sunog sa mga stalls sa Carbon Market sa Brgy. Ermita sa Dakbayan sa Sugbo usa ka semana na ang nilabay, gisusi sa Market Operations Division, Cebu City Disaster Risk Reduction Management Office(CCDRRMO) ug Bureau of Fire Protection ang mga edipisyo sa maong merkado aron pagsubay sa mga linya sa kuryente.

Sa miaging semana dunay nahitabong sunog sa Unit II, Carbon Public Market ug nakita nga daghang mga electrical wirings nga nakita nga peligro sa sunog tungod kay mga substandards kini.

Si Cebu City Market Administrator Irvin Cabales mibutyag nga gipasusi nila sa BFP ang tanang edipisyo sa maong merkado aron tangtangon ang mga kuyaw mamahimong sinugdanan sa sunog.

Ilaha kining tagsa-tagsaon og inspeksiyon aron kalikayan nga masubli pa ang nahitabong sunog sa dapit.

Ang Officer-in-Charge sa CCRRMO Ramil Ayuman miasoy nga girekomendar gyud niini sa Market Operations Divisions nga mohimo og imbestigasyon sa nahitabong sunog sa lugar.

Sa pagsusi nila mga edipisyo sa mga Carbon Public Market nakita sa Bureau of Fire Protection nga delikado gyud ang wiring sa lugar.

“Gubot gyud, delikado gyud, kay ingon ani gud posible gyud ni naay illegal tapping di gyud ni kalikayan sa ingon ani nga area, mas maayo gyud nakaplastar tanang kuan nato kay mabantayan man ato, labi na atong wirings nga close kaayo gipangsulod og mga tubo, di gyud ka kita og illegal,” pasabot ni SFO1 Peter Caburne, Fire Safety Inspector sa San Nicolas Fire Sub-Station.

Samtang si Cabales miasoy nga nasabutan nila sa BFP himoon ang inspection kada stall, i-inventory ang mga gamit ingon man ang wirings nga gigamit.

“Other than  kung defective or substandard atong tagaan og three day notice then comply, ang dili mo comply sirhan,” sigon ni Cabales. (BANAT NEWS)