Mga limbongang timbangan gipaligsan

Cebu, Philippines — Walay luna sa kamerkaduhan sa siyudad sa Sugbo kining mga limbungan nga mga timbangan, mao kini ang mensahe nga gustong ipaabot sa Cebu City Market Operations Division atol sa ilang ceremonial destructions nga gihimo sa mga depektoso, dili rehistrado ug limbongan nga mga timbangan gikan sa mga vendors Carbon Public Market.

Kagahapong adlawa, 500 ka mga timbangan ang gipaligsan sa pison apan moabot gyud sa kapin usa ka libo ka mga timbangan ang nasakmit nga gub-onon pa sa siyudad.

Matud ni Market Administrator Irvin Cabales ang maong mga timbangan nakalapas sa patakaran sa merkado sama sa wala marehistro, kuwang ug sobra sa timbang, depektuso ug buak ang samin.

Si Cabales miingon nga gihimo nila kini aron tarungon ang sistema sa kamerkaduhan sama sa pagprotektar sa mga konsumidor batok sa mga vendors nga nigamit og limbongan nga timbangan ug magsilbi sab kining proteksyon sa ubang vendors nga nagtinarong.

“Mao gyud nay giingon ni Mayor Edgar Labella ang iyang standing order nato is himoong hapsay, luwas ug makiangayon ang atong merkado so as the Mayor said, mao ni atong gibuhat aron pagprotektar pud sa public ug sa atong vendors,” ni Cabales pa. Ang Carbon Public Market dunay dul-an 4 mil ka mga manindahay nga nanggamit og timbangan hinungdan gustong ipaabot sa Market Operations Division nga mao nay mahitabo kun dili maminaw ug dili sundon ang balaod nga gipatuman sa siyudad.

“Last month nag-conduct ta og on-site registration sa atong mga timbangan so ang kadtong wala gyud nagparehistro mao ni gidangatan nila,” asoy ni Cabales. Samtang nagpadayon ang pagparehistro sa mga timbangan si Cabales miasoy nga niabot palang sa 1,200 ka mga timbangan ang narehistro sa siyudad.

Ang pagparehistro P20 ra ang bayad nga balido na sulod sa usa ka tuig. (BANAT NEWS)