Gikan mipiyansa gi-ambush, mama napagan

Cebu, Philippines — Batan-ong nalambigit sa illegal nga drugas ug bag-ohay pang nipiyansa ang gipusil patay samtang naangol sab ang 60-anyos nga inahan niini nga iyang kauban sakay sa taksi samtang nagdagan pa diha sa eskina sa North Road ug H. Abellana sa Barangay Basak, Dakbayan sa Mandaue Lunes sa gabii.

Si Police Staff Sergeant Limar Pontillas, imbestigador sa kapolisan sa Presinto 3  sa Mandaue City Police Office (MCPO) miila sa namatay nga mao si  Nico Niño Perez,  taga Sitio Sudlon sa Barangay Maguikay sa Dakbayan sa Mandaue.

Samtang ang inahan niini nga naangol mao si Elvira Perez, 60. Duha ka wala mailhing mga lalaking nagsakay og motorsiklo maoy gitumbok nga mipusil sa mga biktima.

Matud pa ni Pontillas, gikan pa sa bilanggoan sa Bureau of Jail Management and Penology (BJMP)  sa Lungsod sa Consolacion ang namatay nga batan-on  human nakabutang og piyansa sa kaso sa ilegal nga drugas nga giatubang niini.

Si Perez nadakpan sa kapolisan sa Lungsod sa Consolacion sa miaging bulan sa Oktobre  2020.

Nagtuo ang kapolisan nga gisundan ang taxi nga giluwan sa duha sa mga lalaking nagsakay og motorsiklo ug pag-abot sa nahitaboan nakalugar sila pagpusil kang Perez. Gituohan nga si Perez lang maoy target apan napagan ang inahan niini.

Gisui pa sa kapolisan kun unsa ang motibo sa mga mamumuno apan gidudahan nga may kalabotan kini sa illegal nga drugas. (BANAT NEWS)