Pagbalik sa TPUJs malangan pa

CEBU, Philippines — Malangay pa ang deployment sa mga traditional PUJs (TPUJs) sa Siyudad sa Sugbo human ang Cebu City Jeepney Task Force mibutyag nga gisibog ang schedule sa swab test sa mga drivers.

Kagahapong adlawa gilusad ang pre-launching activity of Balik Pasada Program diha sa Plaza Sugbo nga gitambongan sa mga opisyales sa siyudad pinangulohan ni Cebu City Mayor Edgardo Labella.

Matud ni Konsehal James Anthony Cuenco, pangulo sa task force nga kagahapon unta ipaubos sa swab test ang 200 ka mga drivers apan dunay kakulian gamay tungod kay kinahanglan pa nila mo-comply sa palisiya sa Department of Health labot sa testing. Ang gipasabot ni Cuenco mao ang palisiya sa ahensiya nga ang coronavirus disease (COVID)-2019 tests alang sa non-diagnosis purposes buhaton pinaagi sa pooling. “Gamay ra gyud ang na-test ganina, tungod sa kakulian. We were told by the DOH to stop kay, I think, there was a lack of coordination… kinahanglan nga pooled testing,” Konsehal James Cuenco.

Pooled testing

Ang pooled testing ipaagi sa paggrupo sa lima mga tawo nga i-test aron makamenus sa gastos sa RT-PCR test kits. Mao sab kini ang gihimo ngadto sa mga vendors sa Carbon Public Market sa miaging buwan.

Ugmang adlawa, gikatakdang makigtagbo ang mga opisyales sa siyudad sa DOH-7 aron han-ayon ang pooled testing kun tandem testing ba gamit ang RT-PCR ug rapid antibody tests. Ang RT-PCR maka-detect sa COVID-19 virus samtang ang rapid antibody test ang ma-detect mga antibodies.

Sumala pang DOH-7’s chief pathologist, Dr. Mary Jean Loreche, ubos sa Project Ark ug Go Negosyo, ang transport sector giawhag sa pagpaubos sa pooled testing.  Sigon ni Cuenco nga ang siyudad nakatala og 1,200 ka mga drivers alang sa traditional jeepneys nga nakarehistro sa Balik- Pasada Progama base sa datos nila kagahapon Nobiyembre 9, 2020. Tungod sa pagkaoktaba, gipaabot ni Cuenco nga mapun-an pa ang mga drayber nga maparehistro tungod padayon pa man ang pagdawat niini.

Malaumon si Cuenco nga mahitabo ang pooled  testing sa sunod semana.

Health protocols

Si Mayor Labella  miawhag sa traditional public utility jeepney (TPUJ) nga siguradohon gyud nga estriktong mapatuman ang mga minimum health protocols karon nga makabalik na sila og pamasahero.

Gawas kang Labella mitambong sab sa maong kalihokan silang Vice Mayor Mike Rama, Konsehal Joel Garganera, LTO-7 Director Victor Caindec ug LTFRB-7 Director Eduardo Montealto Jr.  Ang mga TPUJs magsiyam ka buwan nang nakulban og kaldero tungod sa pandemiya. Kagahapong adlawa, gipresentar usab ang modelo sa traditional jeepney nga abrubado sa health officials sa siyudad nga ipasunod kanila ug maoy gamiton sa pagpamasahero.

Vehicle inspection

Sa laing bahin, si Montealto miklaro nga dili matugotan ang TPUJs nga makapamasahero kun dili sila makapasar sa inspeksyon sama sa emission test ug pagsunod sa safety protocols.

Giawhag ni Montealto ang mga operators nga ipaubos sa inspeksyon ilang mga pasaheroan tungod kay kun dili nila kini buhaton dili sila isyuhan og special permits.

Apan sa pagkakaron, giangkon ni Montealto nga nagkaproblema pa sila sa pagbukas sa one-stop-shop emission testing center nga ibutang diha sa SRP tungod sa koneksyon. IBM (BANATNEWS)