Kable sa koryente og komunikasyon sa Mandaue ipabalhin
Cebu, Philippines — Gitinguha karon sa kagamhanan sa Dakbayan sa Mandaue ang pagbalhin sa mga nagkutay nga linya sa kuryente ug komunikasyon nga giuyonan usab sa mga mitambong sa public hearing.
Si Konsehal Joel Seno kinsa maoy nangamahan sa ordinansahon maoy nangulo sa public hearing nga gitambongan usab sa mga representante sa Visayan Electric Company (VECO) telephone, mga cable company ug mga department head sa lokal nga kagamhanan sa maong dakbayan.
Base sa gisugyot nga ordinansahon ni Seno, ibalhin sa underground ang mga electrical ug cable wire ug adto kini magsugod sa business district sa North Reclamation area.
Atol sa public hearing iyang gipasabot ang kamahinungdanon sa pagbalhin sa mga gikutay nga linya sa kuryente ug sa nagkadaiyang komunikasyon aron mahimong luwas ang publiko. Si Konsehal Seno misugyot nga hatagan ug usa ka tuig ang himoong rehabilitasyon sa mga linya sa koryente ug ubang utility lines. (BANAT NEWS)
- Latest