1,355 ka PUJ nga napili sa unang evaluation hashasan pa
CEBU, Philippines — Gimandoan na ni Mayor Edgar Labella si Atty. Floro Casas Jr., city administrator nga mohimo og koordinasyon ngadto sa ubang transportation business aron matabangan ang mga drayber sa traditional PUJ’s nga dili malakip sa listahan sa mga posibleng makabiyahe sunod buwan.
Nasayran nga sa pasiunang evaluation 1,355 ka PUJ ang posibleng makabiyahe apan hashasan pa kini.
Ang dakbayan aduna kini kapin sa 5,000 ka tradisyonal nga PUJ.
Matud ni Labella nga tabangan nila nga himoan og rekomendasyon ang mga drayber aron magamit ang ilang abilidad sa pagmaneho ngadtosa ubang kompaniya sa transportasyon sama sa taxi , trucking ug uban pa.
Nasayran nga nahulma na ang pasiunang pagtuon sa task force nga nagtuki sa maong butang ug ang dugang evaluation ipahigayon karong Oktubre 30 hangtud sa November 3.
Ang malakip sa listahan ipaubos kini og seminar sa Cebu City Transportation Office ug pahimagnoan kini sa safety protocols atol sa ilang pagbiyahe.
Sa laing bahin, human sa sunod-sunod nga disgrasya sa kadalanan nga gikalambigitan sa mga Ceres bus nakakuha kini og attention ni Labella .
Si Labella nagtinguha nga makighinabi sa kadagkoan sa Ceres bus aron mapahimangnoan sa safety rules sa kadalanan.
Buot usab masayod si Labella sa lakang sa maong kompaniya aron dili na mausab ang maong mga panghitabo.
Sa record sa information office sa Cebu City Police Office nikabat na sa 21 ka bus gikan sa nagkalain-laing kompaniya ang nalambigit sa road accidents sa dakbayan sukad sa pagsugod sa buwan sa Oktubre. Rowena D. Capistrano/BDB (BANATNEWS)
- Latest