Sweldo sa nurse sa probinsiya usbawan

CEBU, Philippines — Ang hunta probinsiyal nipalabang og ordinansa alang sa usbaw sa sweldo sa mga nurse diha sa provincial ug district hospitals.

Ang nahisgutang ordinansa gitawag kini og “Ordinance Upgrading and Modifying Public Health Nurse Positions of the Province of Cebu 2020”.

Ang salary grade sa mga Nurse 1 position gi-upgrade kini base sa local budget circular ug Salary Standardization Law of 2019.

Ang Nurse 1 nga position nga ubos sa salary grade 11 i-upgrade kini ngadto sa salary grade 15.

“The salary grade of Nurse I position is hereby upgraded by four (4) salary grades (SGs) effective not earlier than 01 January 2020”, tipik sa nahisgutang ordinansa nga gipangamahan ni Bokal Glenn Anthony Soco.

Nagpasabot kini nga gikan sa P22,316 hangtud sa P24,391 mosaka na kini ngadto sa P32, 053 hangtud sa P34,801 ang sweldo sa mga Nurse 1 depende sa salary step ubos sa Salary Standardization Law.

Ubos usab sa maong ordinansa adunay modification sa mga nurse position sa mga nurse sa probinsiya.

 Ang Nurse II mahimo kining Nurse 1 nga adunay salary grade (SG) 15; ang Nurse III ngadto sa Nurse II nga adunay SG 17; gikan sa Nurse IV ngadto sa Nurse III nga adunay SG 19 ug Nurse V ngadto sa Nurse IV nga SG 20 usab ang sweldo.

Ang maong ordinansa nag-cover sa tanang nurse position nga empleyado sa Cebu Provincial Health Office, Cebu Provincial Hospitals ug District Hospitals ug Cebu Provincial Detention and Rehabilitation Center lakip niini ang regular, casual o contractual ang nature ug full-time o part-time. /BDB (BANATNEWS)