P50 mil gikawat sa city health office sa Lapu-Lapu
CEBU, Philippines — Mokabat sa P50,000 nga salapi ang gituohang gisakiyo sa mga kawatan nga milungkab sa buhatan sa City Health Department sa Dakbayan sa Lapu-Lapu .
Si Police Master Sergeant Rudy Janagap, imbestigador sa Presinto 3 sa Lapu-Lapu City Police Office, miingon nga dili pa nila matino ang mga nahanaw tungod kay ang mga laptop ug computer wala man matandog sa nahimutangan.
Dugang pa niya nga gipanglugit ang door knob sa mga pultahan hinungdan nga kini naguba ug gisirado kini pagbalik.
Gitataw ni Janagap nga ilang nasuta nga nangukay ang mga kawatan nga nakasulod ug giingong nahanaw na usab ang mga sobre nga giingong donasyon unta alang sa patay.
Nagtuo si Jaganap nga mga bata ang naghimo sa maong pagpanglungkab ug kuwarta lang ang tinguha nga kawaton kay wala man dad-a ang mga mahalon nga mga butang.
Gitataw niya nga lakip usab sa nahanaw ang contribution sa annual membership sa mga barangay health workers (BHW), ug ang sinking fund ug kuwarta sa ilang nutrition officer.
Nasayran gikan kang Grace Carungay ang pangulo sa buhatan sa Epidemiological and Surveillance Unit sa maong dakbayan nga ilang namatikdan nga naguba na ang door knob sa opisina niadtong Sabado sa buntag. /MEL (BANATNEWS)
- Latest