Kalihokan sa pista sa Talisay ug sa Naga gisugdan ubos sa ‘new normal’ nga paagi

CEBU, Philippines — Bisan sa higpit nga pagpatuman sa health protocols tungod sa pandemiya sa Covid-19 nagmalampuson ang gihimong motorkada kagahapong adlawa sa imahen ni Sta. Teresa de Avila sa Dakbayan sa Talisay.

Kini maoy opening salvo alang sa nagsingabot nga kapistahan sa patron sa mga Talisaynon.

Si Police Major Gerard Ace Pelare, pangu sa Talisay City Police Station nagkanayon nga sa wala pa miabot ang maong adlaw gihimo nila ang sunod-sunod nga panagtigom aron mapatuman gihapon nila ang safety ug minimum health protocols.

Wala sab nila tugoti ang bisan kinsa nalang nga pribadong sakyanan nga makauban sa motorkadaa aron mamenosan ang trapiko sa kadalanan.

Matud pa ni Pelare nga wala silay nakitang problema sa maong kalihukan apan padayon silang magbantay sa palibot sa simbahan aron ang mga tawo magmatngon sa ilang mga lihok.

Ang Talisay ubos pa gihapon sa Modified General Community Quarantine (MGCQ) nga nagpasabot nga aduna gihapon ang virus sa palibot.

Samtang sa Dakbayan sa Naga susama sab kahigpit ang pagpatuman sa health protocols sa gobiyerno atol sa pagsugod sa nobenaryo alang sa pangilin ni Señor San Francisco de Assisi kagahapong adlawa.

Sama sa Talisay, ubos pa sa MGCQ ang dakbayan maong gipili nila nga walay kalingawan.

Si Mayor Kristine Vannesa Chiong wala mitugot sa pagpaninda diha sa plaza, baywalk, boardwalk ug sa atubangan sa simbahan aron dili makaagni sa mga tawo nga magtapok-tapok.

Si Chiong nalipay hinuon tungod sa kooperasyon sa katawhan sa pagtuman sa mga safety ug health protocols.

Gihangyo sab niya ang tanan nga padayon manalangin sa ilang patron nga tabangan sila sa tanang panahon ilabi na karong dunay pandemiya.

Ang pista sa Naga saulogon karong Oktubre 10 matag tuig. /IBM (BANATNEWS)