Executive order sa Dumanjug nagdili sa tapok tapok

CEBU, Philippines — Gidili sa Lungsod sa Dumanjug ang panagtapok sa mga balay ug selebrasyon uban ang mga bisita, higala ug dili myembro sa pamilya atol sa mga adlaw padulong sa pagsaulog sa ika-165 nga founding anniversary celebration sa Dumanjug karong Oktubre 4.

Usa ka Executive Order ang giluwatan ni Dumanjug Mayor Efren Gica kalabot niini. Sumala pa sa maong EO, ang lungsod nakatala na og 29 ka kaso sa coronavirus disease. "Due to this recent development, there is a need to implement strictly the health protocols especially as the annual Fiesta Celebration of the Municipality is fast approaching" pagbasa sa maong EO. Ang maong kamandoan epektibo kini hangtod Oktubre 5, 2020.

Samtang hugot nga nituman sa tanan protocols ang mga manimbahay sa St. Michael the Archangel Parish sa Lungsod sa Argao atol sa ilang kapistahan.

Ang tanang nanimba nagsul-ob og facemask ug mituman sa social distancing ug misubay usab ang simbahan sa kapasidad sa mga tawo nga pasudlon.

Ang misa sa fiesta gipangulohan ni Auxiliary Bishop Midyphil Billones, team moderator sa team of pastor sa National Shrine of St. Joseph sa Dakbayan sa Mandaue.

Mapasalamaton si Billones sa katawhan nga nituman sa mga health protocols ug labi na ngadto sa mga frontliners nga naghimo sa ilang tabang para sa ilang isig kaingon.

Si Billones nidasig sa katawhan nga mahimong kahayag sa ilang isig ka ingon, ug padayon gihapon makigbisog sa tanang hagit sa kinabuhi uban sa panabang sa Ginoo ug pag-ampo. —Rowena D. Capistrano/MEL (BANATNEWS)