Taga probinsiya sa Sugbo nagkompiyansa

CEBU, Philippines — Usa ka medical expert ang mipasidaan nga posibleng mosaka nasab og maayo ang mga kaso  sa Covid-19 sa probinsya sa Sugbo tungod daghang mga tawo ang wala mosunod sa mga health protocols.

Si Dr. Peter Mancao, tigpamaba sa Cebu Medical Society miingon nga nabantayan nini sa kalungsoran sa probinsiya nga daghan ang wala na magsuot og face mask, wala mag social distancing karong nanglabay nga mga adlaw.

Pipila ka bulan na ang nakalabay si Mancao mao ang mibutyag sa tinud-anay nga hulagway sa mga tambalanan sa Cebu City nga giingong “overwhelmed” na ug ang moral sa mga healthcare workers ubos kaayo tungod sa padayong pagsaka sa mga kaso.

Karon, subling mipasidaan si Mancao sa nagkadaiyang mga kalungsoran sa probinsya nga dili mahimong mokompiyansa ang mga tawo tungod kay gipaubos na ang tibuok probinsya sa Modified General Community Quarantine (MGCQ).

Nanghinaut si Mancao sa mga LGUs nga hugot gihapon nilang monitoron ang mga tawo nga kinahanglang magsuot og facemask ug mosunod sa social distancing.

Sa sayo pa, ang tigpamaba sa Department of Health-7 Dr. Mary Jean Loreche miingon nga nakab-ot na ang “flattened curve” sa Covid-19 dinhi sa Central Visayas apan kinahanglang tutokan ang probinsya sa Sugbo tungod sa padayong pagdaghan sa ilang mga kaso.

Ang probinsya adunay 573 ka aktibong kaso apil na niini ang nadugang nga 29 ka bag-ong kaso niadtong Septiyembre 11.

Sa mga aktibong kaso, 125 ang naa sa tambalanan samtang 448 ang naa sa isolation ug nianang adlawa sab, dunay  duh aka bag-ong natala nga nakalas ug karon miabot na tanan og 327 o case fatality rate nga 6.19%.

Base sa DOH-7 tracker, tanang mga LGUs sa probinsya nakatala na og kompirmadong kaso sa COVID-19, apil niini ang tagsa sa Tudela ug Pilar ug duha sa Poro, Camotes Island.

Samtang sa component cities, ang Danao maoy labing daghan og aktibong kaso nga  48, gisundan sa Talisay nga 46, Toledo City dunay 44, Carcar City dunay 39, Naga City dunay  23, ug Bogo City sa ilang 17.

Matud ni Mancao bisag usa lang ka tawo nga positibo sa Covid-19 mahimong makatakod og daghang tawo kun dili sundon ang health protocols.

Dugang pa ni Mancao, kinahanglang himuong panag-ingnan sa mga residente sa probinsya sa Sugbo ang nahitabo sa Cebu City nga ni-relax og maayo niadtong unang gipaubos sa GCQ niadtong bulan sa Hunyo.

Nabalaka si Mancao nga kun magpadayon kini pagsaka sa mga kaso gikan sa probinsya sa Sugbo, mameligro na sab ang tambalanan sa Cebu City diin sagad dad-on ang mga taga probinsya nga dunay mga grabeng sintomas kay sagad sa mga level 3 hospitals naa mahimutang sa maong siyudad.

Kun mahitabo kini, matud ni Mancao, magproblema sab og apil ang Cebu City nga karon palang nakaginhawa og gamay ang mga healthcare workers.— The Freeman/IBM