Mga sakop sa CDRRMO sa Mandaue gipaubos sa training
CEBU, Philippines — Gipaubos sa training ang mga sakop sa City Disaster Risk Reduction and Management Office (CDRRMO) sa Dakbayan sa Mandaue may kalabutan sa ilang pagtubag sa bisan unsang alarma taliwa sa hulga sa coronavirus disease.
Lakip sa ilang gibansay-bansay mao ang pag-katkat sa tag-as nga mga building alang sa pagluwas og kinabuhi.
Gihimo ang maong pagbansay sa mga personnel sa CDRRMO aron pagsiguro sa paghinumdom kanunay ug dili makalimtan ang ilang mga nakat-onan sa pagluwas og kinabuhi sa higayon nga adunay mahitabo nga katalagman.
Nunot sa pagpaubos kanila sa High Angle Rescue Training gisiguro usab nga ang mga CDRRMO personnel dali nga makahimo og paagi sa pagluwas og kinabuhi panahon sa katalagman sama sa linog, baha, pagdahili sa yuta o mahitabong sunog.
Si Atty John Eddu Ibañez nga maoy executive secretary ni Mayor Jonas Cortes sa iyang pagpasabot miingon nga sa kasamtangan ang mga CDRRMO personnel maoy gitahasan sa pagkuha sa detalye sa gipuy-an nga panimalay sa molopyo nga positibo sa COVID 19.
Nunot niini gitataw ni Ybañes nga bisan pa sa maong bag-ong tahas sa mga sakop sa CDRRMO angayan nga dili gihapon niini kalimtan ang ilang kaakuhan ilabi na panahon sa kalamidad. /MEL (BANATNEWS)
- Latest