Lima nagtigbakay nakaeskapo pasakaan gihapon og kaso
CEBU, Philippines — Pasakaan og kaso sa kapolisan sa Consolacion Police Station ang unom ka tawo nga nagpasiugda og tigbakay sa Barangay Pitogo niadtong Domingo sa buntag.
Sa unom, usa lang ang nadakpan apan ang lima nga nakaeskapo ang nailhan sa kapolisan.
Si Police Master Sergeant Achilles Bacorta sa Consolacion Police Station niila sa nadakpan nga si Christian Medalle, 26-anyos, nagpuyo sa maong lugar.
Ang mga nakaeskapo nailhan sa mga angga nga sila si Bobet, Butchoy, Jackson, Bankay ug Libat.
Matud ni Bacorta nga nakadawat sila og pahibawo gikan sa usa ka nagpakabana nga molupyo sanglit namatikdan man niini nga ang panagtapok sa mga sugarol sa maong lugar daw wala gyud mosubay sa gihingusgan sa kagamhanan nga minimum health protocol.
Dugang pa ni Bacorta nga sanglit ang gipahigayunan sa maong tigbakay nahimutang man sa bungtod nga bahin hinungdan nga nakita sila sa mga sugarol sa ilang pag-abot ug nagkatibulaag sa pagpanagan.
Si Medalle nga lakip usab sa nidagan ang nagunitan sa nakasugat nga polis hinungdan nga nadakpan ug temporaryo nga gisulod sa detention cell.
“Wala na namo naabti ang uban nga mga sugarol kay lisud man ang lugar pero ang usa nga nadakpan ug maoy nakaila sa lima nga nakaeskapo,” nagkanayon si Bacorta.
Gitataw ni Bacorta nga ilang gihimo ang higpit nga pag-monitor sa nagkadaiyang dapit sa Lungsod sa Consolacion tungod kay nakadawat sila og mga taho nga magpasiugda gyud og tigbakay ang mga sugarol.
“Sige gihapon tigbakay bisag bawal unya wala pa gyud mag-mask,” dugang ni Bacorta. /GMR (BANATNEWS)
- Latest