Ang Ginoo nakig-uban kanato – kanunay

CEBU, Philippines — Nagtuo ako nga matag usa kanato perpektong binuhat sa Ginoo.

Kini bisan pa dunay mga estoryang “nobody is perfect.”  Apan supak ko niana. Sa ginaingon palang nga ang tawo binuhat sunod sa imahe sa Ginoo nagpasabot lang nga kita sama og dagway sa atong Magbubuhat.

Kun dili man kita perpekto, di kini sayop sa Ginoo.  Nahimo kitang imperpekto tungod sab sa atong mga kasaypanan. Kita maoy nagpaubos sa atong kaugalingon, tinuyoan man o dili tungod kay kita may nagbuot pagsagubang sa mga hagit ug pagsuway nga gihatag kanato sa Ginoo aron hatagan ta og oportunidad nga angayan kita para Kaniya.

Ang pagsalig sa Ginoo gitanom na kanako nilang Mama Pining ug Lola Andè. Sa among pamilya, wala ipamugos ang relihiyon, apan kaming mga anak nakat-on pagpatubo sa among espirituhanong relasyon pinaagi sa mga ehemplo sa among mama ug lola, nga parehong aktibo sa simbahan.

Ang Balaang Batang Hesus, Señor Santo Niño,  kanunay nakong gikauban sa akong panaw sa kinabuhi. Ang pagsalig importante kaayo para nako. Ang gahum sa pag-ampo dako og papel sa mga nahitabo, madako o magamay pa kini.

Pinaagi sa giya sa among katiguwangan, kami sa akong igsuong si Eddie, nipadayag sa among debisyon isip sacristan ug  “tigpamagting sa kampana” sa gagmay pa kami.  Mao kadtong mga panahona nga ang Santos nga Misa litukon pa sa pinulongang Latin sa wala pa kini usba sa Vatican II. Ang pari kaniadto mag-atubang lang sa altar, nakatalikod sa mga nanimba. Nakahinumdom pa ko sa mga ngalan sa pipila ka mga Espanyol nga paring Agustino  anang panahona nga silang Padre Pablo Alava, Padre Diaz, Padre Leandro Moran, ug Padre Medina.

Bisan pag-okupar sa mga Hapon niadtong Ikaduhang Kalibutanong Gubat , wala kami mohunong ni Eddie pagserbisyo sa simbahan. Dihang nahuman na ang gubat, mas nahimong mabulokon ang among pagserbisyo, mura og bag-ong kabuntagon human bagyo.

Di gyud namo makalimtan niadtong hapit nang mahuman ang gubat, naigo og bomba ang Basilica – apan wala gyud kini mobuto! Nagbitay lang ibabaw sa ulhan sa imahen sa Snr. Santo Niño.

Ang mga Amerikano na maoy nitangtang sa maong bomba ug gidala sa layong lugar, wala maunsa ang imahe sa Balaang Bata ug ang simbahan. Sa akong pagtuo, ang kabubut-on sa Ginoo maoy nagpugong sa bomba sa pag-ulbo ug dili kay paso kadto.

Ang among pamilya usa lang sa daghang mga deboto nga nakasinati sa walay kamatayong gugma sa Santo Niño diha sa among panimalay ug kasingkasing– sa rason nga wala nako hisabti. Apan tungod sa among debosyon, gikalipay namo ang among koneksyon sa grasya sa Ginoo.

Sa akong mga igsuong Sugboanon, di nato itugot nga buntogon kita sa mga hagit ug kalisdanan—bisan pa ning Covid-19 pandemic. Anaa Siya kanato sa tanang oras aron kita suportahan sa atong pakigbisog. Kun kita mosalig Kaniya, walay gubat nga dili nato kayang buntogon. IBM (BANATNEWS)