Kapitolyo mohatag og P24 milyones sa poro water project

CEBU, Philippines — Dili na kinahanglan pa nga mangutang ang lungsod sa Poro sa isla sa Camotes alang sa waterwork system niini gumikan ang Kapitolyo na maoy mohatag sa P24 milyones nga pondo alang sa maong proyekto.

“Ayaw na lang mo pangutang kay ang Kapitolyo mogahin og P24 milyones alang niana” matod ni gobernador Gwendolyn Garcia sa report sa Sugbo News, ang news portal nga  gidumala sa Probinsya sa Sugbo. Si Garcia nitambong sa tigom sa mga tourism stakeholders sa Camotes niadtong Agosto 9 alang sa pagbukas balik sa tourism activity sa isla sa Camotes.

Si Mayor Edgar “Garry” Rama nagkanayon nga ang maong proyekto gipaabot nga mahuman dayon karong tuiga kon diin ang first phase niini makabenepisyo og mga tres mil ka panimalay ug lain pang tres mil sa ikaduhang phase.

Ang Poro nagtinguha kini nga ma-upgrade ang water distribution line sa tubig sa lungsod ug mahuman ang level III waterworks system nga makabenipisyo sa barangay Mercedes, Esperanza, Cagcagan, Adela ug Teguis.

“Sa pagkakaron lisud ta sa patubig kay kining atong transmission lines dugay-dugay na gyud. Kinahanglan nga ilisan. Kinahanglan ta’g dugang nga mga bomba, makina, ug mga reservoir para sa pagpundo sa tubig” matod ni Rama sa report sa Sugbo News.  /MEL (BANATNEWS)