Kapolisan sa Central Visayas nakadawat og pasidungog

CEBU, Philippines — Nakadawat og pasidungog gikan sa Police Regional Office PRO-7 ang mga polis sa Central Visayas subay sa kasaulogan sa National Police Community Relation Month.

Kini taliwa sa nahimong papel sa  kapolisan nga giisip usab nga mga frontliners aron mapatuman ang mga lagda sa community quarantine aron masumpo ang pagkatap sa COVID-19.

Ang paghatag og pasidungog sa mga achievers nga kapolisan gipaagi sa virtual awarding uban si PRO7 Director Police Brigadier General Albert Ferro ug ang tanan nga mga unit sa Central Visayas.

Lakip nga gipasidunggan isip Best Senior PCO for PCR mao si Police Lieutenant Colonel Emelie Santos ang hepe sa Bogo Police Station, Best Junior PCO for PCR mao si Police Captain Romar Labasbas ang hepe sa Panglao Police Station. Samtang gipasidunggan sab ang Bohol Provincial Police Office (BPPO) isip Best PCR Provincial Police Office tibuok rehiyon.

Usa sa highlight sa pasidungog mao ang pagkamalampuson sa Bayanihan Program sa PNP diin adunay pipila ka mga indibidual nga nahatagan og pabahay sa kapolisan ubos sa maong programa.

Usa na niini mao ang pito ka managsuon nga taga Sitio North Guinabasan Barangay Tubigamanok lungod sa Asturias.

Matud ni Ferro nga adunay managsuon nga nagpuyo og barong-barong human nga namatay ang inahan niini ug napriso usab ang amahan tungod sa kalambigitan sa illegal nga drugas.

Dugang pa niya nga subay sa adopt a family program sa kapolisan gitabangan nila ang managsuon ug usa na niini ang paghatag og hapsay ug hamugaway nga panimalay.

Gawas niini aduna usab mga pabahay program ang kapolisan sa mga pili nga pamilya sa nagkalain-laing lugar sa Central Visayas. /MEL (BANATNEWS)