Lalaki gipusil patay sa riding-in-tandem

CEBU, Philippines — Patay ang  usa  ka 49-anyos nga lalaki human kini pusila sa riding in tandem nga nagsunod kaniya niadtong Sabado sa hapon diha sa Barangay Pulpogan, Lungsod sa Consolacion.

Si Police Major  Verniño  Noserable, hepe sa  Consolacion Police  Station niila  sa biktima nga mao si Joseph Gaviola, nagpuyo sa maong dapit.

Matud ni Noserale nga sa wala pa mahitabo ang insidente padulong na pauli  sa ilang panimalay ang biktima dihang duha ka wala ilhing mga lalaki nga nagsakay og motorsiklo kalit lang nibutho ug ang angkas niini nihulbot sa giloklok niini nga kalibre .45 nga pistola ug dayong pusil ngadto sa biktima.

Ang biktima kinsa nakaangkon og mga samad pinusilan sa iyang lawas nahagba kini diha sa karsada ug daling gidala ngadto sa tambalanan apan gideklara kini sa mga doktor  nga patay na nga naabot sa tambalanan.

Human sa maong pagpamusil,  ang mga kriminal dali kining nisibat pahilayo sa lugar.

Si Noserale nibutyag nga nakadawat sila og mga taho gikan sa mga molupyo sa lugar nga giingong nalambigit  ang biktima kaniadto  sa ilegal  nga drugas.

Ang kapolisan nagpahigayon og follow up nga imbestigasyon pagpiho sa motibo sa maong pagpamusil ug pag-ila sa mga kriminal. – Romeo T.   Limpangog/BDB

TCPS nakadawat na usab og pasidungog

Ang Talisay City Police Station (TCPS) sa ikaduhang higayon nakadawat na usab og pasidungog.

Napili isip “Best Component City Police Station for Police Community Relation” sa tibuok rehiyon-7 ang TCPS pinangulohan ni Police Major Gerard Ace Pelare.

Ang maong pasidungog atol kini sa gipahigayong kalihukan sa kasaulogan sa 25th PCR month sa kapolisan.

Matud ni Pelare nga ang ilang nadawat nga pasidungog naggumikan kini sa iyang mga sakop nga nihatag sa ilang serbisyo.

Sa nilabayng buwan, ang Talisay City Police Station nakadawat usab og pasidungog human sila napili isip “Best Investigation Team” sa tibuok Probinsiya sa Sugbo.

Si Pelare nagkanayon nga lain na usab kini nga hagit kanila nga mas palambuon pa ang ilang serbisyo alang sa katagbawan sa katawhan.

Samtang si Mayor Gerald Anthony “Samsam” Gullas Jr. mapasigarbohon sa grupo ni Pelare.

Ug padayon usab ang iyang suporta sa tanang programa sa kapolisan. /BDB (BANATNEWS)